Mara Autonomous District Council (MADC) inthlanpui neih zawh taka Member of District Council (MDC) atana thlan mi 25-te chu nimin khan rinawmna thu tiamtira lak luh an ni a, vawiinah MADC term thara thutkhawm hmasa ber neih a ni dawn. BJP party-in Larsap hnenah sorkar an siam theih thu ziakin an thlen.
12th MADC-a MDC thar lak luh inkhawm hi MADC Forest Hall-ah nimin chawhma dar 11 khan neih a ni a, District Council Court & Recorder President K.Vanlalliana chuan MDC atan thlan thar mi 25-te chu rinawmna thu tiamtirin a la lut a. MDC lak luhte hian Mara tawng emaw, saptawng emaw, an duh zawk zawk hmangin thu tiam an chham a ni.
MADC term thar atana thutkhawm hmasa ber chu vawiina neih turin ruahmanna siam a ni a. He thutkhawm atana protem chairman turin Chakhei biala BJP ticketa MDC atana thlan tlin, K. Hrahmo chu ruat a ni.
District Council & Minority Affairs department Secretary Maria CT. Zuali chuan nimin khan protem chairman tur ruatna hi tichhuakin, MADC (Constitution, Conduct of Business etc) Rules, 2022 tlawhchhanin Larsapin K. Hrahmo chu protem chairman atan a ruat tih a tar lang.
MADC inthlanpui neih zawh takah khan party mala sorkar siam thei tura seat 13 la pha an awm lo a, sorkarna siam tura indawrna kal mek karah BJP party chuan seat la tam ber an nih angin sorkar an siam theih thu chu ziakin larsap hnenah nimin khan an thlen.
The Zozam Times zawhna chhangin BJP Mizoram State President Vanlalhmuaka chuan MADC-ah sorkarna siam ngei an tum thu sawiin, seat la tam ber an nih angin sorkar an siam theih thu chu larsap hnenah an thlen tawh tih a sawi a, hetihlai hian sorkar buk a nih hunah an lama kal tur chungchang erawh an la sawi theih loh thu a sawi bawk a ni.