Aizawl: Ramri depa an duty-na hmuna an tui tlan nu tak ‘video record’ siama social media-a thehdarhtu nia puh, Mizoram police suspend tawkte chu Congress thalaiin an thlavang hauhin John Neihlaia, IPS, IGP an hmu.
An president, Dr Lalmalsawma Nghaka hoin MPYCC chuan nimin khan tun hnaia ramri depa Mizoram police duty, an tui tlan nu tak ‘video record’ siama social media lama darh ta avanga suspend tawk, Hav. Dengthangpuia leh hemi kaihhnawiha May 13, 2022 hmaa insawi fiah tura mi pathum an kohte thlavang hauhin IGP chu an sawipui a. John Neihlaia pawhin hemi chungchangah hma a lak tur thu Congress thalai hruaitute a lo hrilh niin MPYCC hian thuchhuah an siam.
Congress thalai chuan tuihawk nu tak ‘video viral’ ta kha Saipum khua atanga km 20 vela hlaa Mizoram police-te duty-na hmun a nih thu an tar langin, tuna suspend tawk leh insawi fiah tura kohte hi zahngai taka hrethiama an hrehawm tawrh mekte thawi dam nan thupek mek sut turin Mizoram sorkar an phut thu an sawi.
Assam leh Mizoram ramri buai a reh theih loh avanga ramri-a duty Mizoram police-ten thil liantham lo taka hrem an tawk chu vanduaithlak an tih thu te, ramri duty police-te awmna hmun leh tui tlan tur mumal awm loa ram chhan nana police duty-ten hotute vaukhanna an tawk chu vanduaithlak an tih thu Congress thalai hian an sawi a, “Ramria duty police-te duty-na hmun hi ruahtui pawh tha se lirtheia tlawhpawh zung zunga siam tur a nih laiin, sorkarin a hnuchhawn tlat hi pawi kan ti hle,” an ti.