Khaw fai ber Biate, dist. khawpui fai ber Saitual, Aizawlah Ward XVIII

UD&PA department-in kum 2021 chhunga Mizoram pum huapa faina kawnga inelna an buatsaihah Biate chu khaw fai berah thlan a ni a, district khawpui zinga fai berah Saitual thlan a ni a; AMC huam chhungah Ward XVIII chu fai berah thlan a ni bawk.
Mizoram pum huapa faina kawnga inelna 2021 result puanna hi nimin khan UD&PA changtu, Deputy Chief minister Tawnluia hovin Aizawl Vanapa Hall-ah buatsaih a ni.
District khawpui zinga fai berah Saitual thlan niin, a dawttuah Lunglei, pathumna dawngtu chu Mamit a ni a. Khaw fai berah Biate khua thlan niin, a dawttu chu Ngopa khua niin, pathumna chu West Phaileng khua an ni.
Aizawl Municipal Corporation huam chhunga ward 19 zinga fai berah AMC ward XVIII thlan a ni a, pahnihna chu Ward III leh pathumna chu Ward X-in an dawng.
Best Local Council lawmman chu Laipuitlang Local Council-in an dawng a, Best Village Council lawmman chu Tumpui, Kolasib-in an dawng a. Kum 2021 chhunga hmasawn chak district headquarters-ah Hnahthial district thlan an ni a, faina kawnga khawpui hmasawnna chak berah Khawhai thlan a ni.
Heng bakah hian khawpui hrang hrang atanga thlanchhuah, Faina Pasaltha ‘Swachhta Warriors’ pakua hnenah chawimawina hlan an ni bawk.
Mizoram khawpui fai inelna hi October 2, 2021 atanga tanin November 30 thleng Mizoram khawpuite pawh an inpuahchah a, December 1, 2021-ah endiktuten endik tanin, faina leh thianghlimna mai piah lamah bawlhhlawh sawngbawl dan tha te, inthiarna fai, tha leh changtlung bakah garbage free ni tura an hmalaknaah te leh ram leilung humhalhna kawnga an hmalaknaah te endik an ni.
He hun UD&PA Department Secretary K. Lalthawmmawia kaihhruaiah hian khuallian, Deputy Chief Minister Tawnluia chuan faina leh thianghlimna kawnga sorkar hmalakna leh he thila khawtlang hruaitute leh tlawmngai pawl hrang hrangte thawhona leh tanho zarah Aizawl leh Mizoram khawpui dangte chuan faina kawnga hma an sawn chak tih a sawi.
Tawnluia chuan, bawlhhlawh hman tangkai leh sawngbawl kawnga sorkar hmalakna te sawi bawkin, Self Help Group-te hmang tangkaiin bawlhlawh atanga thil tangkai siam chhuah, Waste to Earth ruahmanna kalpui mek a nih thu sawiin, “Bawlhhlawh atanga thil tangkai siam chhuah leh bawlhhlawh tawih ral thei atanga lei tha siam chhuah, home composting chu SEDP hnuaia trade thlen theia ruahman a ni,” a ti.
Chawhnu lamah faina kawnga hmalakna hrang hrang inhrilhriat leh puanzar programme ‘Swachhta Conclave 2022’ hman a ni bawk a, UD&PA hotuten faina leh thianghlimna bakah bawlhhlawh sawngbawl chungchangte, Open Defecation Free Plus leh Swachh Survekshan chungchang bakah Single Use Plastic that lohna te presentation pein, zirhona hun hman a ni.

Category I (Aizawl City)
1st Prize: Ward XVIII
2nd Prize: Ward III
3rd Prize: Ward X

Category II (District Headquarters)
1st Prize: Saitual
2nd Prize: Lunglei
3rd Prize: Mamit

Category III (Other Urban Tawns)
1st Prize: Biate
2nd Prize: Ngopa
3rd Prize: West Phaileng
Best Local Council
1st Prize: Laipuitlang LC
2nd Prize: Salem Veng LC
3rd Prize: Republic Vengthlang LC

Best Village Council
1st Prize: Tumpui, Kolasib VC
2nd Prize: Kawrthah Joint VC
3rd Prize: Dinthar, Khawzawl VC

Fastest Mover Town of District Headquarters: Hnahthial

Fastest Mover Town of Other Urban Towns: Khawhai

Leave a Reply

Your email address will not be published. Required fields are marked *

error: Content is protected !!