- Lallunghnema, Charity Lodge
Kan chenna khawvel hi a chakna te chawpin a boral mek tih thu Bibleah kan hmu a. Bibleah inziak chiah lo mahse, kan khawvel hi chu a chhe chak khawp mai tih hi zep rual a ni love. Nitin kan hmu a, nitin kan hria a nih hi! Sualna a pung a, thatna a kiam zel a. Hengte hi Consumer issue hian a hrilhfiah chho mek zel a ni.
Chutih laiin khawvel a chhiat zel loh nan mi tha hnemngai tak takin hma an la mek reng thung a ni. Keini Consumer Right atchilh burho pawh hian Zoram chhe zel tur hi kan vei ve tho mai, kan veng ve reng a ni.
Thil man to chak lutukte, bungraw hman tlak lo zawrh leh hralh hluar ta em em te, expiry date pelh hnua bungrua hralh tam ta lutuk te, ei tlak lo, thianghlim lo ei tur hralh leh zawrh a awm tawh loh nan mi thahnem ngaiten hma an la reng a ni.
Consumerte venhim leh an dikna leh an chanvote zirtir a, humhalhsak hi tul hlein kan hria a. Nitin zantin tuktina chhungkawtinin an mamawh an leinaa harsatna an tawh thin te sutkianpui hi tihmakmawh a ni, kan ti a ni. Consumer Right an hriat loha mena ‘exploited’ an ni thin hi kan tuarpui a, heng an sal tanna atang hian pawh chhuah kan tum a ni.
He Mizoram zim te, mihring pawh tlem te, hmasawnna ruhrel hmuh tur tlem te, mipui hmasawnna leh changkanna aia nawmsip bawlna ngaihpawimawh zawkna hmunah hian Consumer tam zawh chuan consumer an nih pawh an hre lova, consumer an nih anga harsatna an tawh phei chu, eng ualah an ngai lo. Hetiang hmuna chengte hian mamawh kan nei a. Chu kan mamawh chu Consumer Protection Rules nasa leh chak taka hman tangkai a ni. State Sawrkar pawh hian Rules tihpuitlin hi hna pui berah neih se, chu chu Activist-te beisei a ni.
Mizoram pawn kan thlir chuan Consumer issue chak takin an kalpui a, Consumer Commission an chak a, mipuiin an right an aware hle bawk. Consumer Mechanism an hmang tangkai em em a ni. Consumer Court a thubuai remna leh chanchin thar hi chhiar tur eng lai pawhin a awm reng bawk. Mizoramah hi chuan kan ram hruaitute chawp hian Consumerism tihharh kan la ngai a ni. Consumerism a kan harh chhuah hma chuan Mizoramah hian sual kan la khawi reng tihna a ni ang. Thil te tham a kan ngaih, keini’n, “Ni mai rawh se” kan tih liam mai angah hian pawisa hlutzia hre chiangtu leh an dikna leh an chanvo hre chiangtute chuan an namnul mai mai ngai lo. Cheng khat lekah pawh hian nu tling pa tling an tal buai nasa thin hle a ni. Vai pakhat Dan hre miin Cheng khat a pek kir duh loh avanga Consumer Court a mi pakhat a khin thu he Huangah hian ka ziak tawh nghe nghe a ni. Chhuak hnuhnung berah a nih nghe nghe kha.A chhiarte chuan in theih nghilh hman ka ring lo. A la rei lo em mai.
May 30 hi CONSUMER SOLIDIRATY DAY a ni a. India ram chhung hmun hrang hrang a hman tur a ni. Consumer Advocacy Group a kan Convener chuan activist te chu he Day hi ngaipawimawh tur leh hmang ngei turin min chah a. Hmanho pawh a tha khawp mai. Thil eng emaw han buatsaih dawn hi chuan pawisa a ngai zel a. Eng pawh ni se, eng emaw tak chu tih tum ila, a tha ang e. Consumer Solidarity Day hian a tum ber chu Consumerte tui zawng leh duhnate tihpuitlinsak a tanpui thin a ni a. Consumerte nekchepna lak atanga chhan chhuah a ni bawk. Tihhuaisen, tihhmasawn, tumruhna neihtir, rinawm taka an chanvo leh an mawhphurhnate hlen chhuahtir a ni. Solidarity tih hrim hrim hi Mizo tawng pawhin inlungrualnate, inpumkhatnate, thawhhonate a ni. He Day thil tum hi Consumer-te rilrua inpumkhatnate, inlungrualnate leh thawhhona tha tak tuh a ni. Inpumkhatnate, thawhhonate leh inlungrualnate tel lo chuan hma a lak theih loh tluk a ni. Chuvangin consumerte hian inpumkhatna leh inlungrualnate hi kan mamawh bik niin a hriat. Thil man to thut thutte, bungraw chhep relh thuahte hian kan tanrual a tul em em a, SOLIDARITY kan mamawh a ni. Dan anga mamawh sem leh pek chhuah lohte, buk tling lo a thil hralh chungchangah hma la turin consumerte kan tanho thiam a tul hle bawk.
Consumer-te hi tangrual thiam lo leh tangrual peih lo pawl tak kan ni mai thei. Consumer thila ka inhman ve chinah hian consumerten tanrual kan thiam lohzia leh tanrual kan peih lohzia hi a taka hmutu ka ni awm e. LPGas lak leh sem chhuah thuahte, Gas laknaa reciept chungchangahte, buk chungchangahte hian kan tanrual loh avangin tun thleng hian kan la tuar zel a ni. Home Delivery phei chu kan tanrual loh pheng avang hian veng pakhat bakah tih a la ni lo! Kan nepzia tilang tu mai mai chauh a ni. Kan at man kan la chawi zel dawn! Kan at vangin kan la tuar zel dawn! Mahni hmasialna a khat Zo Consumerte hi (mi thiam inti leh lemchan thiam politicianho hmer telin) kan mawl man kan la tel zel zawng a nih hi! Harh a va hun ta em! Nang leh kei kan nep em avang hian consumer kan nih angin kan chanvo kan cho let ngam si lo!
Mi dawizep tak, Dawrkai leh Sumdawng chalak ho hlau chunga intifing i ni e.
Consumer-te ram economy siam tha tur leh corruption do turin i pen chhuak ang u. He ramah hian awm mai mai suh. Sual do rawh. Sual chu Consumerte tuarna hi a ni. Tunah hian nitin a lo thleng mek a ni. Chuvangin Consumer Solidarity hi ngaihthah lovin i ngai pawimawh ang u, tiin Consumer Huang chhiartu zawng zawngte kan inngen a ni.
Chawlhkar kal taah khan Cheng hnih khat lek avanga District Consumer Commission hnena Ukil pakhatin complaint a thehluh thu leh thiam a chan tak thu kan sawi tawh a. Tun tumah hian Carry bag inleitir chungchang leh a behbawm kan sawi thung dawn a ni. A leitirtu hian a tifuh lo nak nak hle a ni.
Kha tia Mrs Reema Chawla-in Mumbay City Phoenix’s Markets Esbeda Store atanga Rs 1690/- man bag a lei khan. A thil lei dah nan carry bag Rs20/- man leitir nghal a ni a. Danah chuan customer hian dawrkai thil an lei hian an thil lei dah emaw ah nan emaw bag zangkhai te hi pek (present) an ni thin a. Mahse, Dan bawhchhiatna gets dawr nghaktu hian Cheng sawm hnih man lek chu a lo leitir a ni. Chawla lungawi lo chuan Deficiency in service leh unfair trade ti a puhin he Dawr hi Mumbay City a District Consumer Disputes Redressal Commission pakhat hnenah zualkovin a khing ta a ni.
District Commission hian deficiency leh unfair trade ti a puhin hetiang thubuai hi a rem ta a ni.
- He Dawr hian Complainant Reema Chawla hnenah Rs 20/- a pe kir leh ang.
- Complaint buaipuina a Complainant, Mrs Chawla hnenah Rs 3000/- chu he Dawr neitute hian an pe ang.
- Zangnadawmna Rs 10000/- chu Chawla hnenah hian Store hian a pe ang
- Consumer Welfare Fund -ah Rs 25000/- chu Dawr hian an chhung lut bawk tur a ni.
- Thubuai remna hi ni 40 chhungin Opposite Party hian a tipuitling tur a ni.
Hetiang vel hi a ni e.
Mi ram thubuai remna kan tichhuak ta zel a. Mizoramah hi chuan Court kal kan hlau a, kan hreh a. Vaiho chuan an hreh lo a. An dikna leh chanvo sual chhuak tur hian engmah tih hreh an nei lo. Hei tak hi vaiho ropuina leh puitlinna chu a ni.
Mizorama mi puitling kan tihte hi eirukna atanga intiliante, politician suakte, officer eiruk chingte, sawrkar hnathawk hlawh phu lo a che liante, pastor chhe mite, kohhran upa thu thluanghote hi an ni ta berin a lang. Hengho zingah hian nang chu tel ve suh. Consumer hliah hliah ringawt mai rawh. I inchhir lo ang e.
I thil lei leh hmannaah i lungawi lo,
I ngawihpui mai mai!
I dawizep vang a ni lo!
Assertive Consumer i nih loh vang a ni e.
Consumer right hria hi mi fing an ni.