Mara Autonomous District Council (MADC)-a sorkarna siam turin BJP leh MNF chu awlsam taka thawk ho mai tura an ngaih thu leh an thawh dun theih loh chhan a awm an hriat loh thu Congress party thupuangtu, Dr Lallianchhunga’n a sawi.
Aizawl Press Club-ah Inrinni khan thu thar thehdarhtute kawmin Dr Lallianchhunga chuan, “Central lamah BJP kaihhruai NDA leh NEDA hnuaia thawk ho sa, sam inphiar zawm sa reng an nih avangin MADC-ah pawh hian awlsam takin an thawk ho mai turah kan ngai a, an tan thawhdun theih lohna tur a awm kan hre lo,” a ti.
Dr Lallianchhunga hian BJP leh MNF-ten sorkar siampuiah Congress party an sawm ve ve niin a sawi a. An sawmna hi Congress party thuneitu sang, Political Affairs Committee (PAC)-in ngun taka a ngaihtuah hnuah eng party mah thawhpui loh an rel tih a sawi a. BJP leh MNF-ten thawhhopuiah sawm mah se, sorkar tha lo leh nghet lo tak siam ai chuan eptu lama awm rih tha zawk nia an hriat avangin an thawhpui ta lo tih a sawi.
Congress thupuangtu chuan, “Congress party leh BJP-te hi India rama political party lian ber leh inep na ber pahnih, policy pawh inang lo kan ni a. BJP chu sakhaw tih bik nei a nih laiin Congress party chu sakhaw tih bik nei lo, sakhaw tin leh hnam tin lenna a ni. Chuvangin, BJP nena sorkarna siam dun hrim hrim hi thil tih chi-ah kan ngai lo,” a ti.
MNF party chungchang sawiin Dr Lallianchhunga chuan, “MNF nen MDC 13 chiah chiah neia sorkarna siam theih niin lang mah se, Autonomous District Council-ah hian thlan tlin uirete hremna dan (Anti-Defection Law) a awm ve loh avangin sorkar lo siam ta pawh nise awlsam taka pheh thluk theih reng a ni dawn,” tiin, Congress party hian thuneihna chan ngawr ngawr hi a tum a nih loh thu leh sorkar tha siam hi an tum ber a nih thu a sawi bawk.
MADC-ah hian sorkar nghet tak leh sorkar tha tak ding se tih chu an duh dan ni mah se, an party-in MDC pali chauh an neih avangin Mara mipuiten opposition-a thu turin an duh rih tihnaah an ngaih thu leh, mipui mipui tam zawk duhthlanna hi a zahawm an tih thu Congress thupuangtu hian a ti.
Zawhna chhangin Dr Lallianchhunga chuan tun dinhmunah chuan Congress party MDC thlan tlin tharte chu PAC thutluknaah kawikawm thin ang thapin an la ding a, thlemna nasa tak an dawn hnuah pawh party tan an la awm thei hi an chhuang tak zet tih a sawi a. Hetih lai hian Congress atanga MDC thlan tlinte zingah PAC duh dan kalha che an awm a nih chuan party hotuten an chungchang an ngaihtuah tur thu leh hma lak a nih tur thu a sawi.
The Zozam Times zawhna chhangin Congress thupuangtu hian sorkar siampuiah MNF leh BJP hian an biak avanga lo dawngsawng an nih thu a sawi a; amaherawhchu, thutlukna tak tak erawh PAC-a innghat a nih avangin an duh ang khan a kalpui theih loh thu a sawi a. BJP chungchang bikah, “Kan party dinna pakhat chu BJP-in Mizoramah VC emaw, LC emaw, ADC a ni emawah te sorkar a siam ve hrim hrim hi Mizo Kristiante tarmit atangin dik theiin kan hre lo,” tiin a chhang bawk.