South Tuipui bialtu, Minister Dr. R. Lalthangliana’n hmun thenkhatah contractor ten hna an hralh thin thu sawiin, “Hna a thatloh phah a, hna a muang bawk a, hetiang hi chu keini chuan kan duh loh zawng tak a ni”, a ti.
Dr. R. Lalthangliana chuan Inrinni khan a biala khaw hrang hrang tlawhin khawtlang hruaitute nen an inkawmnaah he thu hi a sawi a. New Ngharchhip, Ngharchhip, South Chawngtui, Khawhri, Aithur leh Tarpho khua te tlawhin helaia kawng siam mek chawlhsan a ngaihmawh thu a sawi.
A biala kawng siam lai chawlhsan chu sorkar hmasa hunlaia an lo inpek a nih thu Dr R Lalthangliana chuan sawiin, contractor pawh a la hmuh loh thu leh telephone erawh chuan a biak tawh thu a sawi a. Theihtawpa department leh contractor-te ah pawh hmalak a tum thu sawiin, “Kumin August thla chhung hi chuan an zo hman tawh turah kan beisei” a ti.
Commerce & Industry Minister Dr. R. Lalthangliana chuan, Myanmar politics boruak avangin Myanmar nen border trade chungcha- ngah hma an la hleitheilo nia sawiin, Bangla- desh lam nen erawh tluang taka an indawr mek zel thu a sawi a. “Covid-in kum hnih leh a chanve vel min tihbuai nasat avangin kan hmalakna tur tam takah pawh hma kan la hlei thei lova, Covid hian hniam lam a pan mek a, theih tawpin tan kan la mek zel a ni” a ti bawk.
Inrinni vek khan a bial chhung khaw thenkhata Myanmar ram buai avanga raltlan awm te pawh Dr R Lalthangliana chuan tlawhin, tanpuina sum te a pe bawk a ni.