Thubuai hrang hrang rang zawka chin felna, National Lok Adalat chu Aizawl leh district hrang hrang bakah Gauhati High Court (Aizawl Bench)-ah te Inrinni khan neih a ni a, thubuai 1,000 chuang chin fel a ni.
Gauhati High Court (Aizawl Bench)-a Lok Adalat neih chu High Court Judge Michael Zothankhuma, Mizoram State Legal Services Authority-a executive chairman ni bawk chuan endikin, conciliator-te leh thawktu dang bakah litigating party-te nen inhmuhkhawmna remchang tak a siam.
Lungleiah chuan Lok Adalat hi bench pahnihah an thu a, bench 1-na hi judicial officer leh Secy. DLSA Lalhmachhuana kaihhruaia neih a ni a, bench 2-na hi Lalrinpuii, Judicial Officer kaihhruai a neih a ni.
Thubuai ngaihtuah tur lut 94 zinga 65 chin fel a ni a, heng zingah hian bank loan pakua chin fel a ni a, mi sum puk thubuai leh leiba thahnem tak chin fel a ni a, a vaiin Rs 81,66,291 chin fel a ni.
District Court Mamit-ah pawh bench pahnih an thu a, bench pakhat hi Laldinpuia, Secretary, District Legal Services Authority (DLSA) hovin an thu a; bench pakhat hi F. Laltlansangi, Judicial Magistrate First Class (JMFC)-in hovin member-te – C. Lalrammawia, Lalmuanzova Pachuau, Ngurthansanga Sailo, Vanlalfaktluangi, Advocate leh H. Lalruatfeli, Advocate te an thu bawk.
An thubuai ngaihtuahte hi rambuai chungchang paruk, pawisa chungchang thubuai 15 leh neitu inchuh thubuai pakhat leh civil case pahnih a ni.
Inrinnia hmun hrang hranga National Lok Adalat neihah hian thubuai 1150 chin fel a ni a, sum leh pai kaihhnawih thubuai an chinfel zat belhkhawm chu Rs 5,84,11,281 a ni.