Aizawl : Mara Autonomous District Council inthlanna neih zawh taka MDC atana lak luh tak MNF member mi pakuate chu MNF Dist Hqrs Siaha-ah lawmpuina nimin khan neih a ni. He hun hi Social Welfare department changtu, Siaha bialtu MLA Dr K Beichhua’n a hmanpui.
He hunah Minister Dr K Beichhua chuan thu sawiin, tun \um MADC inthlanpuiah Pathianin member pakua a pe chu lawmawm a tih thu a sawi a. MDC thar te chu ‘Pathian leh kan ram tan’ tia mahni phat ngam nun nei turin a fuih.
Siaha bialtu MLA chuan, “MADC ah sorkar theih chu kan duh; mahse, kan sorkar thei lo a nih pawhin eptu lamah huaisen tak leh rinawm taka thut pawh kan huam, min thawhpui thei an awm erawh chuan kawng zau tak kan hawng reng a ni,” a ti a. MNF member te hi rinawm taka mipui tana ding an nih thu leh, cheng nuai sangkhat pawha lei theih tur an nih loh thu a sawi bawk.
“Mizoramah MNF in chak taka a sorkar mek a, inpawh taka State sorkar MNF-in a thawhpui theih leh pheikhai rual taka hmasawnna kawng zawhpui theih sorkar din chu Mara ram mipui tan duhthusam a ni,” a ti bawk.
Nimin tlai lam thleng khan party pathum BJP (12), MNF (9) leh INC (4) te hian sorkarna siampui tura thawhpui an la nei hlei thei lo a. Naktuka chairman thlanna turah vawiin hi nomination file hun a nih tawh avangin an tihfel a ngai tawh dawn a ni.
He hun hi V. Sangvuana, V/Pre. MNF Dist Hqrs. Siaha in a kaihruai a ni.