Mizoram UPC General PYD Literature Committee leh Literature & Publication Board tangdunin an buatsaih, Pentecost Fak Zai top 20 inelna chu neih zawh a ni ta a, nimin piah khan GPYD YouTube channel kaltlangin top 10 result puanna neih nghal a ni.
Fak Zai inelna hi Dinthar Kohhran Hall-ah neih a ni a, online-a audition round neih a nih hnuah top 20-ah thlitfim a ni. Top 20-ah hian mi 22 an intihsiak a, May 12 leh 13 zan khan music track hmangin top 20 intihsiakna hi neih a ni a, GPYD YouTube Channel-ah live-a pekchhuah niin, Zonet Bawhbelah, May 14 leh 15 zan khan pekchhuah leh a ni bawk.
Pentecost Fak Zai top 10 intihsiakna hi May 19, Ningani zan leh May 20, Zirtawpni zanah neih chhunzawm tur a ni dawn a, live music hmangin inelna hi neih tur a ni tawh ang. GPYD YouTube channel-ah live-a pekchhuah a ni ang a, zan dar 7:30-ah tan a a ni ang.
Television lama en duh tan, Zonet Bawhbel chuan May 21, Inrinni zan dar 8:00-ah zan khatna hi pe chhuakin, May 22, Pathianni zan dar 8:00-ah zan hnihna an pe chhuak leh bawk ang. May 27, Zirtawpni zan dar 8:00-ah Grand Finale neih tur a ni a, Dawrpui Multipurpose Centre-a a tawp kharna hi Zonet Zawlbuk leh GPYD YouTube channel-ah live-a en theih tura pekchhuah a ni ang.