Tripura BJP chuan an party hruaitu eng emaw zat, an MLA langsar tak takte pawh telin, Trinamool Congress (TMC) an zawm dawn nia sawina chu an pha.
“Kan MLA-te hi kan lamtang vek an ni,” tiin Tripura BJP President Manik Saha chuan a sawi.
Saha hian an state-a saffron party chhungah buaina lian a awm lo niin a sawi bawk.
Hetih rual hian an hruaitute zingah ngaihdan inang lo deuh a awm a, chu pawh chu inbiakna neiha tihfel mai theih a nih thu a sawi a. Hei hian an party chhungah eng emaw a awm nia sawi chu a nemnghet.
“Chhungkuaah ngaihdan inang lo deuh a awm a, sawi fel a ni ang,” a ti.
Tripura-ah hian BJP hruaitu eng emaw zat an lungawi lo va, Mamata Banerjee-i kaihhruai Trinamool Congress (TMC)-ah an insawn dawn nia sawi thawm a awm a. Central lama an hruaitu liante pawh Agartala-ah hian kalin state-a an hruaitute nen an inbia.
Agartala-a cham mek zingah national general secretary BL Santosh, Tripura-a organizational general secretary Tripura Phanindra Nath Sharma leh Northeast zonal secretary Ajay Jamwal pawh an tel.
Nilaini khan he state-a an party hruaitu lawk, MP, MLA leh minister te an kawm hlawm.
An inkawmnaah hian MLA 32 an tel a. MLA pali – Binay Bhusan Das, Sambhu Lal Chakma, Biswabandhu Sen and Diba Chandra Hrangkhwal an tel lo.
BJP hian an hruaitu hlun, Sudip Roy Barman chu cabinet-a telh tura tih a ni a; mahse, a hnar nia sawi a ni.
An party hmunpui lama an hruaitute hian an MLA lungawi lo eng emaw zatin TMC an zawm dawn tih sawi a awm mek laiin ching fel turin an kalchilh a ni.