School Education Minister Lalchhandama Ralte chuan nimina MBSE-in HSLC result tihchhuah taka hlawhtling zawng zawngte a lawmpui thu leh, vanduai tate pawh beidawng mai loa thahnem ngai lehzuala hlawhtling ngei tura chona hmachhawn turin a duh tih a sawi.
Lalchhandama Ralte chuan exam buatsaihtu MBSE te, sikul hrang hrang Centre Superintendant te, veng leh khaw hrang hranga task force bakah exam tluang taka neih a nih theihna tura thawktu zawng zawngte chungah lawm thu sawiin, “Covid-19 leng hnuaiah exam kan hmachhawn tum thumna result chu hlawhtling takin kan tichhuak thei ta a. India ram state-a offline mode-a Covid-19 kara pawh exam buatsaiha hmachhawn thei awm chhun kan ni a. Hei hi thawktute leh Mizo mipuite tanrual vang a ni,” tiin The Zozam Times a hrilh.
“Kum 2021-a kan HSLC pass percentage chu kumin hian phak chiah lo angin lang mah se, nikum kha chuan course kha zaa 25 vel lai khan tihtlem a ni a. Kuminah erawh zirlai course kimin hri leng hnuaia kan kalpui a ni a. Chuti chunga kumina pass percentage 70.64 lai a ni thei hi a lawmawm kan ti hle,” a ti.
School Education minister hian tun tum HSLC result chhuaka pass awm lohna sikulte chu sorkarin a chhante zawtin leh eng harsatna nge an tawh tihte sawifiah tura ‘show cause notice’ pek an nih tur thu a sawi a. Heng sikulte harsat tawhte ching fela siam that ngaite siam tha turin sorkarin hma a lak tur thu a sawi bawk.
Covid vanga zirna pangngai kalpui loh vangin pass percen-tage a tlahniam : MBSE chairman
MBSE Chairman JH Zoremthanga chuan nikum aiin kumina HSLC examination result percentage a tlakhniam chhan chu Covid-19 leng vanga kum hnih chuang zirna pangngai kalpui theih loh nghawng a nih thu sawi.
Nimina result tihchhuah a nih hnua chanchibumite a kawmnaah nikum pass percentage chu 80% a nih thu leh kuminah erawh tla hniam deuhin 70.64% a nih thu a sawi.
MBSE chairman chuan, “Pass percentage hniam chhan bera lang chu naupangin kum hnih ngawt off line class an kal lo a, online class kalpui thei lo thingtlang hmun kil khawrah te an awm bawk si a, hei hi a pawh hniam chhan chu a ni,” a ti.
Nikum leh kumina exam an buatsaihah hri leng vanga zirna kalpui mumal theih a nih loh avangin syllabus 30%-a tihtlem a nih thu leh zawhna har titlemin, zawhna tihtam a nih thu a sawi a, tun session kal mekah erawh syllabus 100% zir a ni tawh dawn tih a sawi.
Nakuma HSLC examination an buatsaih huna question pawh a pangngai veka siam an tum tawh thu sawiin, “Zawhna har chi kan tih angte tel tawhin, tun hmaa kan kal dan ang vekin kalpui kan tum tawh dawn,” a ti.
Result complaint hun chhung an tih tawi thu MBSE chairman chuan sawi bawkin, “Complaint hun hi result chhuah atanga ni 15 chhung a ni a, kuminah erawh ni sarih chhung chauh a ni dawn,” a ti a, hei hi naupangte hmakhua an ngaih vang a nih thu a sawi.
Nikuma HSLC exam an buatsaih lai kha Covid-19 len nasat lai a nih vangin hlauthawnna an nei lian hle a, chutihrual chuan exam laia hri kai panga vel chauh an awm thu sawiin, “Kuminah erawh hri a ziaawmah kan ngai a; mahse, zirlai zingah Covid-19 kai mi 104 zet an awm,” a ti.
Exam an beih laia Covid-19 kaite tan special exam an buatsaih tur thu a sawi a, hri kai zinga naupang thenkhat chuan eng paper mah an exam hman lo a, a then chu exam laklawh laia kai an nih thu leh chung mite chu compartment exam ruala exam-tir an nih tur thu a sawi.
Zawhna leh chhanna endik kawngah tih dik loh palh, awm lo tura theihtawp chhuaha tan an lak thu MBSE chairman chuan sawi bawkin, nikum leh a kum hmasa lamah pawh complaint a awm thin avangin kuminah an uluk zuala endiktu zawng zawng chu fimkhurna tur ziaka an pek bakah hmaichhan ah an hrilh thlap thu leh paper endikna level pangngai bakah belh an nei tih a sawi bawk.