Sorkar flagship programme, SEDP hnuaiah Mizoram pumah vaimim chin uar a nih laiin a ei chhetu pangang chi khat, Fall Armyworm (FAW) a puang leh mek a, a puan zel loh nan department-in theihtawp an chhuah tih leh kuthnathawktute pawh an theihtawpa tan la turin Agriculture Minister C Lalrinsanga’n a chah.
Kum 2019 atanga Mizorama inlar tan, FAW hi tun thla tir atang khan Kolasib leh Mamit district-ah a puang leh a, district pahniha khaw 26-a chhungkaw 100 tel lo leh huana vaimimte a ei chhe tawh.
FAW puang leh mekah eng angin nge agriculture department-in hma a lak tih The Zozam Times-in minister a zawt a, “FAW a rawn inlar leh tan tih kan hriat rualin theihtawp chhuahin tan kan la nghal a, pangang thahna tur damdawi kan sem darh nghal,” a ti.
SEDP hnuaia trade thlan theih zingah vaimim chin a tel a, he trade thlangtu lo neitute chu vaimim chi hi sem vek an ni tawh a. Kum dang zawng aiin vaimim thar chhuah hi a pung hluai tura beisei a ni.
Agriculture minister chuan rana intodelh lohnate phu hru tura ran chaw siamna tur leh thil danga hman tangkai tura vaimim chin an uar zual kuma FAW puang leh chu pawi an tih thu sawiin, chutihrual chuan he an ruahmanna tithuanawp lo tura pangang puang tihrem theih an inbeisei thu a sawi.
Pangang thahna atan sahbawn sen a that thu agriculture minister chuan sawi bawkin, “Damdawi kan semte hi lo neitute hian hmang tangkai se kan duh a, chung damdawi dawng ve chiah lote pawhin sahbawn sen hi hmang tangkai thei se, pangang a tihlum lo a nih pawhin vaimim zikhlum chhungah a awm reng theih loh phah,” a ti.
SEDP hnuaia ram pum huapa vaimim chin an kalpui lai meka FAW puang hi a reh vat theih nan department-in a theihtawp a chhuah rualin kuthnathawktute pawhin rannung thah chu ngawrh taka an beih ve a tul tih C Lalrinsanga chuan a sawi.
Kumin atan chauh pawh ni lo, kum lo kal leh zel tur atan pawh FAW hi a rawn in lar fo loh nan an inthlah pung zel tur chu dan chah a tul hle tih sawiin, “Mi tu emaw inthlahdah avanga lo thenkhata an lo inthlahpun vak chuan nakum atan pawh a hlauhawm leh dawn hle a ni,” a ti.
SEDP vaimim chi chu an beisei aia tlaiah Mizoramah phurh thlen a nih thu sawiin, hei hian sawisel hlawh deuh mah se a thatna lai a awm thu a sawi.
Vaimim chi inpek tlai chu vanneihna chi khat a nih dan hetiang hian sawiin, “Ruah sur hi pangang hian an ngeih lo a, a inthlahpun theih loh phah a, ruah tui a tla tan tawh bawk nen SEDP vaimim chin hi a ei chhe tam lo turah kan beisei,” a ti bawk.