Huddersfield Town in khawvel football a inkhel man tam ber tia an sawi thin an khel dawn a. EFL Championship play-off final khel turin Luton Town 2-1 aggregate in an hneh.
Huddersfield khelmual John Smith’s Stadium a inkhelah hian mikhual team in first half thunun zawk mahse goal an khung thei lova. Harry Cornick-a goal khung tur Terriers goalkeeper Lee Nicholls lo dansak chu Luton Town chance tha ber a ni.
Second half-ah pawh Nicholls hian Cornick lakah save tha a siam leh a, mahse minute 82-naah engkim inthlak danglam in veteran striker Jordan Rhodes chuan Sorba Thomas freekick chu goal-ah a chantir a. Hnehna an chan phah.
Kum 2017 atanga 2019 chhunga Premier League khel tawh Huddersfield hian Wembley a final-ah Nottingham Forest emaw Sheffield United te an hmuak mek a. May 29-ah final hi khelh a ni ang.
English Football League Championship playoff final hi khawvela inkhel hlu ber tia sawi a ni thin a, hei hi Premier League a kaisan in sum lamah hlawkna a ken tel hnem vang a ni.
Final a chak in an sum hmuh theih tur zat hi mi thiamte chhut dangin an chetthat dan a zirin Pound maktaduai 150 atanga 260 vel inkar a ni dawn niin an ngai.