Season chawhnu lam an hman that avangin Arsenal in Premier League-ah a sang pali zinga tel tura beiseina lian tak an nei hman a, phurna lian tak nei mahse an tling zo lo leh dawn niin a lang. Thawhtanni zanah Newcastle United lakah chiang takin 2-0 in an tlawm.
St. James’ Park-ah an hmelma Tottenham lehpel a dinhmun tha zawka ding tura chak ngei mamawh Mikel Arteta pawlte hi a khel chhe zawk chiang takin an ni a. Inkhel tan atanga a tawp thlengin Newcastle United an pha lo.
First half a goal a luh loh hnuah second half tan tir lamah Magpies striker inhliam dam leh Callum Wilson-a nawrbuaina karah Ben White mangang chuan an lamah goal a khung a. Kumtir a Newcastle in an lakluh, an season khar thatna kawnga an thiampuipa Bruno Guimaraes chuan minute 85-naah an chakna tichiang turin goal a khung.
Gunners in hlauhawm an nei mumal lova, second half a penalty area hmawr atanga tha taka Mohamed Elneny-a’n a ‘risk’ chu Martin Dubravka chuan a save sak a, lut se goal mawi a ni ang.
Magpies zawkin goal an khung belh teuh a, Wilson-a’n centre bul atang a pet goal teuh hle.
He result avang hian Chelsea chu a sang pali zingah an tel dawn chiang tihna a ni a. Arsenal erawhin season khar ni ah Everton hneh ngei an mamawh a, Tottenham chu tla fel tawh Norwich City laka an tlawm an mamawh tel.
A hun takah Arsenal an che thei lo
Kar hmasa a North London derby-ah an hmelma laka an mualpho hle hnuah Gunners in result pawimawh nei turin insiamthat an mamawh a, mahse a pawimawh ber laiin chiang takin an tlu nawn zawk.
First half-ah ball an hloh hnem a, Newcastle goal bawh na tak lakah theihtawpa an inven a ngai fo. Halftime thleng hram mahse second half an daih rei lova, inhliam avanga December 27 hnua la inkhel leh lo Wilson a tal hnawk hle a. Guimaraes chu fing sem kualtu niin Allan Saint-Maximin chu tlarhnung chhaihbuaitu a ni fova. A laiah Joelinton thahrui ngah leh taihmakna a hnawk hle bawk.
Arsenal boss Mikel Arteta chuan inkhel zawhah, “Kan result a lungawithlak loh hle a, a tir kan tan dan a tawp thleng khan Newcastle kha an tha zawk tih zep theih a ni lo. Keini aiin chak an phu hle zawk a, hei hi pawm harsa tak a ni.” a ti.
“Inkhel hautak leh result tha lo tak tak kan neihin insiamthat leh kan harsat thin a. Tun season tluanin kan chunga thil thleng tam tak avanga insiamrem zung zung kan harsat a. Inhliam kan ngah hle bawk a, mahse hei hi chhuanlam a tling lo.” tiin a sawi.