Mizoram Board of School Education (MBSE) chuan nimin khan High School Leaving Certificate (HSLC) Examination, 2022 result a tichhuak a, a pum puiah Dinsawmkimi d/o Lalhmachhuana St. Joseph Hr. Sec School, Aizawl-a lut leh Lalramdina Ralte s/o Lalthakima, St. Pauls Hr. Sec School-a lutte chu pakhatna an ni.
HSLC result hi MBSE office Chaltlangah tar chhuah a nih bakah online hmanga tihchhuah a ni bawk a. Kum dang ang lo takin result bu lei tuma MBSE office tuala pungkhawm an thahnem lo hle.
Kumin HSLC Examination-ah hian exam hmachhawntu zirlai 17,417 awmin regular student 17,237 leh private-a exam mi 180 an ni.
Exam beitu zingah 12,304 (70.64%) an pass a, chung zingah chuan hmeichhia tam zawkin 6,391 an ni a, 5,913 chu mipa an ni.
Zirlai 1,437 chu distinction-ah an pass a, first division-ah zirlai 3,716, second division-ah 4,309, third division-ah zirlai 2,842 an passed a, Compartmental chance nei zirlai 185 an awm a, zirlai 4,928 an fail a ni.
District tina regular candidate-ah Aizawl district an pass tha ber a, zaa 81.38 an pass a, Siaha-in dawtin zaa 77.10-in an pass a; a pathumna chu Hnahthial niin zaa 73.09 an pass.
Sorkar sikul atanga candidate zingah zaa 58.12 an pass a, deficit school atangin candidate zinga zaa 88.39, aided school atangin candidate zinga zaa 62.79, lumpsum school atangin candidate zinga zaa 68.18 leh private school atangin candidate zinga 79.79 an passed.
Kumin HSLC-ah hian top 10-ah mi 17 an lang a; a pum puiah Dinsawmkimi d/o Lalhmachhuana, Hunthar Veng St. Joseph Hr. Sec School, Aizawl-a lut leh Lalramdina Ralte d/o Lalthakima, Mission Veng, St. Pauls Hr. Sec School-a lutten mark 484 ve ve hmuin pakhatna an ni.
R Lalremngheti d/o Lalrinpuia, Aizawl Salem Veng, St. Pauls Hr. Sec School-a lut chuan mark 481 hmuin 2-na a ni a, MD Aatif Nazir s/o MD Parwez Nazir, Zuangtui Veng, St. Pauls Hr. Sec School-a lut chuan mark 480 hmuin 3-na a ni.
Tute nge Topper?
Dinsawmkimi d/o Lalhmachhuana Hunthar Veng, St. Joseph Hr. Sec School
- Topper a nih a in ring lo a; mahse, a nu leh pa leh zirtirtute phurpuina vangin top 10-a lan phak tumin a inbuatsaih a. Topper ni turin zirtirtute zirtir ngawt ni lo a, mahnia text book-te lo inhai zau ve a tul niin a hria a, higher secondary-ah science subject lak a tum.
Lalramdina Ralte d/o Lalthakima
Mission Veng, St. Pauls Hr. Sec School
- Top ten-a inhlan kai ngei tumin a zir a; mahse, topper em a nih erawh a inbeisei lo thung a, ni khatah darkar nga atanga sarih bawr vel lehkha a zir thin thu a sawi a. Higher Secondary-ah science subject lak a tum a, nih tum a neih thu leh tunah chuan puan zar rih a tum loh thu a sawi.