Mexico-a chin hriat lohva awm mek chhinchhiah zat chuan a tam lai ber tawngin mi 1,00,000 an kai.
Sorkarin kum 1964 atanga a chhinchhiah thinah hian kum 2007-a khatih laia president nihna chelhtu, Felipe Calderón-a’n ‘ruihhlo laka indo’ a puan atang khan chin hriat lohva bo an pung.
Mi bo tam zawk hi mi sual pawl intelkhawm chetna avang a ni a, a titute hremna pek hi thil harsa tak a ni bawk.
Mi bo chhinchhiahtu, attorney general pisa-in report a tihchhuah thar berah chuan kum hnih liam ta chhungin bo hi mi 73,000 atangin mi 1,00,000 chuangah an kai a ni.
Bo zinga hmun lia thena hmun thum hi mipa niin heng zinga hmun ngaa thena hmun khat hi an bo tirha kum 18 la tling lo an ni.
Mi bo chhungte chuan sorkarin zawn hmuh tumin a bei tak tak lo niin an sawi a, thuneitute chhungte zinga bo awm leh mi pangngai zinga bo awm laka hma an lak dan pawh a inang lo niin an sawi.
Mi tam tak chuan an chhungte bo hi anmahniin an zawng fo va, thlan chhinchhiah lohte hai vak an ching.
May 10-a Mexican-ten Mother’s Day an lawm tum khan hmeichhe tam tak chuan kawng zawhin thuneitute chu mi bote zawnah tan la tur leh a ru botute na zawka hrem an duh thu an aupui.
Inruk bo a hluar
UN Committee on Enforced Disappearances chuan Mexico-a mi bo tam zawka a mawhphurtu ber chu mi sual pawl lian tak takte an nih thu an sawi a. An thiltihnaa tela an duh anga awm zui lo te, thuneitute hnena an chungchang thlentu leh eng emaw phut neia an chetna a tam niin a sawi.
Mihring dikna chanvo humhalhtu, Centro Prodh chuan sorkarin policy tha neia mi bo zel tur a vena a titute a nuai bo dan tur engtin nge ni dawn tih a lo zawt tawh.
Ro bo an tamna ber hi Jalisco state a ni a, hei hi Jalisco New Generation Cartel an inbunna a ni.
Tun hnaiah ram dang atanga pemte pawh ruk bo an pung zel a. Nikum khan ram dang mi 349 ruk bo an ni a, a hma kum chiah kha chuan mi 89 chauh an la ni tih Jesuits’ Missing Migrant Search Program (SJM) chuan a tar lang.