Aizawl: Congress party chuan May 17, 2022-a ruah surin Lengpui Airport runway a tihchhiat avanga thlawhna tum thei lo chu an ngaih thutak tih sawiin, “Furpui pawh a thlen hmaa ruah surin Lengpui Airport a tichhia hi hriatthiam theih a ni lo a, a enkawltu MNF sorkar thiam loh dik tak a ni,” an ti.
Nimina an thuchhuahah Congress party chuan, Airport Authority of India (AAI) in Lengpui Airport runway-ah hmun thum laia khuar a awm avangin thlawh thlawk chhuak tur leh tum tur zawng zawng a cancel tih an sawi a. Hei vang hian zin mite’n harsatna an tawk nasain, sum leh pai tam tak a luanral phah avangin pawi an tih thu an tar lang.
“Airport runway tha tawk lo hi hun eng emaw chen atang tawh khan a enkawltu Engineer-te pawhin ngaimawhin a siamthatna tur pawisa MNF sorkarah an lo dil tawh thin a. Amaherawhchu, MNF sorkarin a ngaihsak loh avangin a pe duh lo a, thlawhna tum ngam loh khawpin a chhe ta a ni,” Congress party hian an ti.
Congress party hun lai khan Lengpui Airport runway siam thatna tur hi cheng vaibelchhe engemawzat dah chu MNF sorkarin sum siamna atana hman a duh avangin, hetiang lama thiamna bik nei Company-te thawh tir phal loh thu leh hna a that tawk loh avangin siamthat a ngai leh ta tiin, MNF sorkar hian a rang thei ang bera siamtha a, runway maintenance tha lo chungchanga mawhphurtu dik tak hi zawn chhuaka hrem an phut thu an tar lang bawk.