AIZAWL: BJP Mizoram Pradesh President Vanlalhmuaka chuan MADC-a sorkar siam tura MNF leh Congress te an thawhho hnua Congress President Lalsawta’n Congress MDC te insawifiah tura a ti chu mipui hmaa hmai phih tumna mai a nih thu a sawi.
Nimina an pisa-a party inkhawm an neihah thu sawiin Vanlalhmuaka hian, MADC inthlan neih zawh takah Congress party chuan thu suk rengah a puhin, “Congress party-in MADC-a sorkar siam turin tumah thahwpui an tum loh thu an sawi hnu lawkah MNF nen thawhdunna thuthlung an ziak leh a. Chumi hnu lawkah Congress MDC te insawihfiah tura Congress President in a ti chu mipui hmaa hmai phih tumna mai a ni,” a ti.
Vanlalhmuaka hian, “MNF party lahin CEM nihna hial kianin an zahawmna an hralh a. He’ng party pahnihte hi Mizoram mipui bum char char tute an nih avangin MADC sorkarah hian sorkar tha a din hi a beiseiawm loh hle a ni,” a ti bawk.
BJP Mizoram Pradesh President hian, BJP chu kalphung tha tak nei, National office atanga inkaihhruaina mumal tak neia kal an nih avangin, Congress leh MNG te nena ruallo taka nghawngkawl bak dun an theih loh thu a sawi a. BJP hian MADC-a sorkarna siam hrim hrim duh vanga mahni hlutna leh mipui beiseina ti chhe zawnga hmalak an tum loh thu a sawi.
Hetih lai hian, Vanlalhmuaka hian Mara mipui te tana hmasawnna a awm theih na’n tuna MDC member te, BJP atanga Maraland siam that hna thawh an duh anih erawh chuan englai pawhin an lo lawm reng tih a sawi bawk.