Germany a football club hlun zing ami Hamburg khaw club Hamburger SV chuan Bundesliga khelh leh hnaih tawh hle turin hnehna pawimawh an chang a, Bundesliga Promotion/Relegation Playoff first leg-ah Hertha Berlin 1-0 in an hneh.
Ningani zanah Bundesliga Promotion/Relegation Playoff hi khelh a ni a. Bundesliga a khel zawk Hertha Berlin in first leg an thleng.
Germany a kaisanna inkhel lian berah hian Bundesliga a 16-na leh a hnuai chiah 2.Bundesliga a pathumnaten playoff an khel thin.
Berlin a Olympiastadion-ah hian minute 57-naah Ludovit Reis chuan goal danglam tak a khung a. Mualsir veilam a penalty area hmawr a ball a dawn chu goal hmaah a vawrh lut a, goal zawnah kalin goalkeeper in a ban pha lova, goal awmchhun ni turin a khung.
Hamburg player ropui thin Felix Magath-a hnuaia khel Hertha hian first half-ah goal an khung chu offside avanga pawmsak an ni lova. Goal an chhuah hnuah erawh an insiamtha thei lova, inrintawkna thar nei Hamburg hmaah talbuai laklawh in goal hlauhawm insiam an harsat.
Hamburg hian second leg-ah an dinhmun tha an chhawm tluan thei a nih chuan kum li hnuah Bundesliga ah an kaisang leh anga. Hertha erawh an club chanchin a vawi sarih an tlakna a ni thung ang.
Team naupang tak nei Hamburger SV coach Tim Walter chuan, “Kan result avangin kan hlim hle a, nuam ti tak chungin kan haw dawn a, return leg kan nghakhlel hle. 2.Bundesliga a team naupang ber kan ni chungin Berlin-ah hetiang ang boruak lian leh hautak tak kara kan chak thei hian fak a phu.” a ti a.
“Season tan tirah bul kan tan thatna a nih tur thu kan sawi a, dawhtheih pawh a ngai tih kan hria. Kan hmasawnna te a kaltluang a, zaninah pawh hnehna chang turin kan nau te an huaisen em em reng a ni.” tiin inkhel a thlirlet.
Hertha BSC coach Felix Magath chuan goal vannei tak avangin an tlawm niin a ngai ve thung a, “Inkhel hautak leh hahthlak a ni a, ball a rang a, kan intluk tawk hle. Kan khingpuiten goal vannei an khung a, keini lamin si phurh sut ringawt kan tum a, inkhel kaihhruai kha kan tum lo.” a ti ve bawk.
Return leh hi Thawhtanni zanah an khel leh ang.