ZPM party leader Lalduhoma’n “Kan political goal chu Zohnahthlakte rorelna pakhat hnuaia kan awm hi a ni a, a ni reng bawk ang,” a ti.
Hachhek bial a fannaah he thu hi nimin khan Zawlpui community hall-ah Lalduhoma chuan a sawi a. A thusawi chhimtu Assam ram chhunga awm mek Zohnahthlak, Thangram chung- chang sawiin, “Thangram unaute kan theihnghilh dawn lo, anni hian keipawh min rawn hmu a, an ngaihtuahna leh an duh te kan hria a, duhthlanna fel tak an siam theihna tur kan ngaihtuahpui dawn” a ti bawk.
ZPM leader chuan sorkar siam tura mipuiin an beisei ber chu ZPM an nih thu sawiin, “Lawmluh sen loh mi thar hmuntinah an awm a, mipui koh- na kan chhang seng lo, min thawhsaktu hi a awm a ni” a ti a. India ram pumah Co- ngress an tlachhia tih a sawi a. MNF lah vai smuggler ho phenah an hotu pa ber chief minister a awm niin mipuiin an ngai a,nia sawiin, “Candidate tha tak rawn nei leh mahse, a lu berin a zir loh avangin an tla dawn, an hun a herliam mek” a ti.
Tu emaw pawl nih avanga dawn ringawt tumna rilru paihbo a tul tih Lalduhoma chuan sawiin, “A taima apiang dinchhuahna sorkar, a thawkrim apiangin Mizoram budget an herchhuah hnemna sorkar siam ang u” a ti a. “In tello chuan heng hi a tih theih loh, kan zavaia kan that tlanna turin ZPM-ah lo tel vek turin kan sawm che u” tiin kalkhawmte thlawpna a ngen nghal.
Party dang atanga ZPM-a lut ten an tihdan an kenluh erawh an remtih loh thu Lalduhoma chuan sawiin, “System thlak, tihdan thlak kan tum avangin kalphung tharin kan kal dawn” a ti a. “Party in awp dan kan la neih ngai loh tha tak kan nei a, miretheite leh kuthnathawktute dawmkan kan tum a ni,” a ti.
ZPM leader chuan sorkarna an chang a nih chuan, ramri buaipuitu tur boundary committee an din tur thu leh NGO te nen tangtlanga consensus-a ngaihdan pakhat an neih tur thu a sawi a. “Tunah chuan ramri bula intihbuaina chauh kan ngaihtuah a, status qou chiah kan thleng pha a, a aia thui kan kal a ngai” tiin, “Thenawm ten an bawhchhe zel a, hma an rawn sawn zel a, buaina a awmin kan inbe leh a, chuti reng reng chuan ram kan hloh hret hret zel a, ramri tak tak chinfel tumna awm lo,” a ti bawk.