Aizawl : MZP rorelna sang Federal council nimina thukhawmin Mizorama zirnain hma a sawn theihna turin sorkar enkawl school leh college zirtirtu leh zirlai awm dan zirchian an rawt.
MZP federal council chuan Mizoram sorkarin school zirtirtu transfer & posting rules a neih mek pawh a taka hman a nih theihna tura hmalak an rawt a. “Sorkarin zirtirtu hna a lakin a tling leh tlak ngei lak a nih theih nan MZP-in hma la rawh se” an ti bawk.
National Institute of Open Schooling (NIOS) hnuaia zirlaite harsatna, fees leh result chungchang sutkiang tura hmalak pawh MZP federal council chuan an rawt a. Sorkar hna thar lak reng rengah dik taka lak a nih theihna tura hmalak leh eirawngbawlna Gas subsidy chungchangah mipui harsatna tawh thin chinfel a nih theihna tura hmalak an rawt bawk a ni.
He thutkhawm kaihhruaitu MZP president Lalnunmawia Pautu-in MZP chu sorkar do ngawr ngawr tur an nih thu sawiin, thil ṭhaah chuan sorkar thawhpui tur leh sorkar kalsual tur venga an tih diklohte dodal tur an nih thu a sawi a. “Kan hmalakna reng rengah kan ram leh hnam himna kan dah pawimawh hmasaber tur a ni” a ti.
MZP president chuan MZP chu zirlai pawl a nih angin, an pawl thil tum leh nihphung an chian a pawimawh thu sawiin, “Hruaitu nih duh vang chauha MZP a inhmang ni lovin, zirlaite harsatnaa sutkian puitu, zirlaite lamṭang kan ni reng tur a ni” a ti a. “Zofate chenna hmun Zofa ten kan chan zel loh nan leh kan humhim zel theih nan MZP chuan theihtawp a chhuah zel dawn a, hnamdang kuta kan ram a luh loh nan nasa takin ke a pen zel dawn a ni” tiin, zirlaite chu rilru fim tak pu tur an nih thu leh politics thli chhia leh inchirhthehna laka fimkhur a tul thu a sawi bawk.