MNF president Zoramthanga chuan nimin khan Serchhipah Mizo Hnam Rûn a hawng a, Mizo hnam chu hun hnuhnunga hnam tin hnena chanchintha hril tura ruat an nih thu a sawi.
Zorama chuan, “Hman atanga Pathianin kan ram tun din a tum chhoh danah Mizo hnam hi hun hnuhnungah hnam tin hnena chanchintha hril tura ruat kan ni,” a ti.
Mizoramin Covid-19 leng, ramri buai, raltlan, vawk hri leng leh thil danga harsatna tam tak a tawh laiin Pathianin MNF chu sorkar tura a dah tlat thu a sawi a, hengte avang hian tihfuh leh fuh loh tam tak an neih ve theih tho avangin ram mipuite chu a lan ang mai a thlir lova, a nihna tak hre fiah thiam thin zawk turin a chah.
MNF president chuan an khingpui, ZPM leh Congress party chungchang sawiin, “Party thenkhat leader-te pawh MP leh ruling party president niin bul an tan tawh a, chutihrual chuan tui anga nghet lote kutah Zoram hruaitu nihna chung lamin a pe ngai lo tih kan hmu,” a ti.
Congress party chungchang sawi chhunzawmin, party thenkhat chu Delhi khawnvartui bur an ring a, Delhi lamah a bur a tluk ruah tawh chuan a phita a rawp ral ve nghal mai thin tih sawiin, neitu nihna phun tel lo, mahnia din chhuah tumna zung nei lo, Delhi khawnvartui ringa nungte chu an zuih ral mek a, Jehova Pathian tlansana Lord Krishna ringtute tlakchhiat dan chu nasa tak a nih thu a sawi.
Serchhip Venglaia Mizo Hnam Rûn hmun sakna tur hmun hi June 30, 2002 khan Rs nuai 5-a leiin June, 2005 atanga sak tan a ni a, building sak nan hian Rs nuai 13 chuang sen ral a ni.