Everton in Premier League atanga tlakhniam sual in minute 45 chhung thih tha in an tang a, goal thum hlawhchhuakin Crystal Palace an lehthal a, dinhmun himah an inhlangkai.
An mual Goodison Park-ah Everton hi tlawm ngei turin an lang a. Tunhnaia an chetfuh theih loh chu kaltluang chhunzawmin first half-ah goal hnih an chhuah.
Everton hi an tlak chuan kum 68 chhung English football a division sang bera an inkhelh tawh hnuah an tla dawn. He kawng hi an zawh thui hman hle a, minute 21-naah Jean-Philippe Mateta chuan Palace goal hmahruai khungin second minute 36-naah Jordan Ayew chuan an goal hnihna a khung chhunzawm.
Mahse tlak hlauhawm atangin result sual chhuah tumin Toffees in an bei a. An fans mangang thlaphang in thawm ring tak nen an pui a, a tawpah an hlawhtling.
Coach Frank Lampard-a’n second half-ah chak a ngai tih hria in attacking football a khelhtir a. Second half tan atanga minute 9 a liamin defender Michael Keane chuan an goal hmasa ber a khung.
Minute 21 a kal leh a, forward rinrawl Richarlison chuan an goal hnihna a khung a, point khat an hmuh dawn avangin Goodison Park a mipuite an lawm.
A tawpah erawh a aia ring a thawm a chhuak. Minute nga a la awmin hliam in tun season a nasa taka a tihbuai striker Dominic Calvert-Lewin a inlar a, August thla hnua a goal hmasa ber ni turin Demarai Gray freekick chu a tauh lut a. Stadium chhung thawm a ring.
Hnehna pawimawh an chan avangin Everton in kum 1998 leh 1994 kuma season tawp ni a him hram tura beih ngai lovin an dinhmun an siam a, season tharah season tha zawk hmang tura inbuatsaihna hun an nei dawn.
“Ka huntawn ropui zing ami”
Everton coach Lampard chuan, “Football a ka hun ka hman chhunga hun ropui ber zing ami a ni chiang. Chelsea-ah player leh coach angin hun hlimawm tak tak ka nei, mahse tuna kan boruak nen, kan theihtawp chhuahna rilru nen chuan kan dinhmun a him chiah hi lawmna a danglam.” tiin a sawi a.
“Halftime-ah kan khelchhia a, kan goal chhuah a ho hle. Mahse chak duhna thinlung lian tak kan nei a ni tih kan lantir a, fans te hi kan player 12-na an ni chiang. Dele Alli kha kan dah luh hnuah a kheltha a, inkhel kha amahin a thlak danglam vek.” tiin a sawi bawk.
Blues tan point khat pawimawh
Chelsea in pathumna dinhmun an tana tichiang tluk tawh turin point an hmuh belh a, Leicester City nen 1-1 in an inhnehtawk.
Point khat an hmuh avangin Blues hi palina Tottenham aiin point thumin an sang a, an goal difference an inthlauh avangin pelh theih an nih a beiseiawm tawh lo.
Stamford Bridge a inkhelah Foxes in goal an khung hmasa a, minute 6-naah James Maddison chuan goal a khung nghal.
Hei hi Chelsea tan tunhnaia chhuak tura ngaih Marcos Alonso chuan minute 35-naah a sut.
Inkhel zawhah Chelsea manager Thomas Tuchel chuan pathumna an ni chu dinhmun tha a ni a, inhliam an neih leh thinin an team a tihbuai dan thlir chuan tha tak a ni a ti.
Player pawimawh N’Golo Kante awm lo leh thin chu an tuar tih a sawi a, “Kante hi kan tana danglamna siamtu a ni a, kan player pawimawh ber fal nalh a ni. Mahse player pawimawhte hi khelmual chhungah an awm ngei a ngai.”
“Kan inkhel zawng zawng atang 40% vel bak a inkhel lova, hei vang hian pathumna pawh hi ropui tak a ni. Mo Salah, Neymar, De Bruyne te miin an nei a, ani hi kan tana hetiang ang player hi a ni ve thung.” tiin a player a fak a, hmasawn a ngaih thu a sawi bawk.