Pastor lawmman hi kan pawisa pek a ni em?

• Rinfela Zadeng

Tawngkam danga kan sawi chuan, Pastor hlawh hi kan pawisa pek a ni em tihna a ni. Tun lai khawvelah miin thil kan chîk tawh a, sawi hreh leh sawi zah kan nei tlem tial tial a. Thudik hrulah thudik tawk lo sawiin kan thehdarh a; ngun taka ngaihtuah loh phei chuan thudik emaw tih a awl em em a. Kan Pastor te lawmman chenin, mipuiin kan hlawhfa chhawr ang maia ngaia tawngkam cheh hi hmuh tur a awm ta fo a. Chuvangin Bible, Pathian thu hmangin Pastor lawmman chungchang hi kan zir nawn ang.

Pastor lawmman hi mipui pawisa a ni em?

‘Ni e’ tiin kan chhang thei ang; hnial rual a awm lo. Chutih rual chiah chuan Pastor lawmman tura kan pawisa kan pekna chhan zawk hi kan ngaihtuah ngai em? Nitina kan hlawhfa chhawr te hnenah an hlawh tur pawisa kan pe ang hian em ni Pastor lawmman, tawngkam danga hlawh hi kan pek? Chutiang rilru pu chuan em ni kan thawhlawm – Sawma pakhat te hi kan lo pek thin? Chutiang rilru kan put chuan Pastor te hi kan chawmhlawm, kan pawisa pek tlingkhawm ringa kan chhawr, kan hlawhfa rawih, kan duh duha kan thunun theih turah kan ngai ang a, an lakah kan rilru nat chang a awm fo ang.

Pastor chu tu nge?

Pastor nihna leh a rawngbawlna hi kan hriat chian tawk loh chuan kan hlawhfa rawih, kan thawhlawm tlingkhawma khawsa emaw kan ti fo ang. Chutiang chiah chuan Pastor pawhin a nihna leh a rawngbawlna, Pastor a nihna chhan chiang taka a hriat renga a hlenchhuah chu a mawhphurhna leh a tihmakmawh a ni. Pastor chu Pathianin kohhran te kaltlanga a ruat, a thlan leh a koh, A aiawh tura khawvela a serhhran te an ni. Thuthlung Hluiah chuan Levia chite an ni a; Israel fate’n Kanaan ram an insem pawhin chanvo an nei ve lo a; Pathianin mipuite hnena rawngbawl tura a ruatna kha an chanvo a ni tih kan hmu (Numbers 18, Deuteronomy 20:9). Chu hna zahawm leh mawhphurhna sang tak chu vawiin thlengin Pastor kutah Pathianin a la dah zel a ni.

Pastor lawmman – Sawma Pakhat

Numbers bung 18:21 – a kan hmuh angin Pathianin rawngbawl hna thawktu atana a serh hran Arona leh Levia chite zawng zawng ei tur atan Sawma Pakhat a pe tih kan hmu a. Kristian, Pathian nung ringtu kan nih chuan Sawma Pakhat hi pe turin Pathianin min phût a, kan pek loh chuan Pathian thil kan ruksak a ni tiin Malakia 3:8-10 – ah chiang takin Pathianin min hrilh a. Pathian hnena Sawma Pakhat kan pek chu a thlawn ngawtin Pathianin a phut lo a; malsawmnaa min vur let tur thu leh chu Sawma Pakhat kan pekah chuan Pathianin amah fiah hial pawh phalin a intiam a ni. Khawvela a rawngbawltu te – Levia chi, Puithiam, Pastor adt te ei tur hi Pathianin a ngaipawimawh em em a; Sawma Pakhat pe turin leh chu kan thilpek hmanga Amah pawh fiah hial turin min ti a ni.

Pastor lawmman hi Pathian pek a ni

Pathian ringtu, Bible zirtirna ring tlat mi kan nih chuan, Sawma Pakhat hi Pathian ta a nih zia kan sawi tawh a, kan pek loh phei chuan Pathian thil kan ru a ni tih kan hria. Chuvangin kan thawhchhuah atangin Pathian hnenah Pathian ta Sawma Pakhat kan pe a, chu chu Pathianin khawvela A aiawha a dah Puithiam, Pastor te ei turin a pe a ni. Chuvangin Pastor te hi kan hlawhfa chhawr emaw kan pawisa pek emaw an ni lo a, Pathian hlawhfa rawih, Pathianin a rawngbawl tura a serhhran leh a koh te an ni a. An eitur pawh Pathianin a pe a, keini chu a hmanrua mai kan ni.

Kohhran hruaitute leh rawngbawltute pawhin Sawma Pakhat kan pek chhan te, chu kan thilpek chu Pathianin Pastor te eitura a pek a nih zia teh leh keini chu Pathian hmanrua kan nihna te hi i hrechiang nawn fo ang u.