Aizawl: National Highway 302-in a paltlang, Phairuangkai lei chelh khawngtu pawimawh tak, a zapui pakhat tliak chu tun thlengin zawm that a la ni lo tih, Lungsen group YMA hruaituten an sawi.
Lungsen leh a chhehvela YMA branch 11 inzawmkhawmna, Lungsen group YMA rorel inkhawm chu Inrinni khan Phairuangkai khuaah nghah a ni a; palai kalkhawmten lungrual taka agenda an pawm zingah, NH 302 sial hna thawh tan tawh chak leh tha zawka chhunzawm a nih theihna tura hmalak rawtna bakah, tha zawka Phairuangkai lei thawm a nih theihna tura hmalak rawtna pawh a tel a ni.
Inrinni vek khan rorel palai kalkhawmten a dinhmun zirchianga an tlawhnaah thla khat chuang kal taa Phairuangkai lei zapui tliak chu tun thlenga zawm a la ni lo tih an hmuchhuak a, a chelh khawngtu pawimawh tak a tliah avang hian lei chhuat phah pawh a tlahniam tial tial nia sawiin, chhiatna nasa zawk a thlen loh nan lirthei lian tan ritphur chunga lei chu zawh loh ni thei se an duh tih an sawi a ni.
Lungsen group YMA chuan lei zapui tliak an hmuhchhuah chu tun hnaia tliak ni loin, thla khat chuang kal taa tliak tawh, tun thlenga la zawm loh nia an hriat thu an sawi a; tun hnaiah kawng siamna tur châk leh bungraw dang rit tak tak phur thinten lei chu an zawh ngun a ngaih avangin chhiatna lian tham a thlen palh an hlauhthawn thu leh, chumi a thlen hmaa thawmṭhat thuai an duh thu, an sawi bawk a ni.