Anthony Albanese chu Australia ram hruaitu thar atan lak luh a ni a, ram dang hruaitute nena intawh khawmnaa tel turin a zin chhuak zui nghal dawn.
Albanese-a kaihhruai, Labor Party chuan Scott Morrison-a kaihhruai, conservative chu Inrinni khan hnehin sorkarna a siam a ni.
Albanese-a hian party mal chauhvin nge mi dangte thawhpuiin sorkar a siam dawn tih erawh a chiang rih lo.
Prime minister thar hian lak luh a nih hnu lawkah Thawhtanni khan Tokyo pan nghalin Quad an tih – United States, India leh Japan ram hruaitute nena intawh khawmnaah a tel nghal ang.
Thawhtannia a zin chhuah hma lawk hian chanvo pawimawh zual chelh tur cabinet member palite nen lak luh an ni a. Lak luh zingah hian Foreign Minister Penny Wong pawh telin ani pawh hi a rualin Japan a pan ve nghal.
Richard Marles chu deputy prime minister thar niin employment minister a ni bawk a, Jim Chalmers chu treasurer niin Katy Gallagher chu attorney-general leh finance minister a ni.
Tun hi kum 10 dawn hnua Australia-a Labor-in sorkar an siam lehna hmasa ber a ni a. Vote tla chhiat tawh chinah rorelna in hniam zawkah seat 74 an chang tawh a, party mala sorkarna siam thei turin seat lak a ngai a, an tlin dawn em a la hriat rih loh.
Australia-ah hian mi nawlpuiin party lian an vote thin a tlahniam a, hmun thuma thena hmun khat chuan Greens, independent leh party tenaute an thlang hlawm.
Greens hian rorelna in hniam zawkah seat li an chan theih a rinawm a, sik leh sa lam buaipuitu independent-a ding pasarih an tlin a rinawm bawk a. Hetiang a niha Labor-in party mala sorkarna an siam zawk loh bawk chuan member hlu tak an ni thei hlawm dawn a ni.
Tun tum an inthlanah hian sik leh sa inthlak nasa chu mipui rilru thununtu lian tak a ni a, inthlan chuhtu zinga chet lak thuai duhte chu mi rilruah an tla na niin a lang.
Morrison-a sorkar khan kum 2030-ah emission an tihchhuah chu 26%-28% vela tihhniam hman an intiam a, hei hi UK leh US ramten an tum aia a zahve chuanga hniam a ni a. Albanese-a hi chuan 43%-a tihhniam hman a tum a ni.
Prime minister chhuak ta, Morrison-a kha mipuiin an duh ta vak lo va, sik leh sa chungchanga a party kal dan chu Liberal MP thenkhatin nasa taka sawiselin hei hi a tlak chhan pakhat a ni.
Tling zo lo zingah an party hruaitu lawk, deputy leader Josh Frydenberg pawh telin Liberal thatna bialah a tling lo.
Morrison-a hi Inrinni khan an party hruaitu a nihna atangin a bâng a, defence minister thin, Peter Dutton chuan a thlak a rinawm.
Dutton-a hi an party hruaitu hlun tak ni mah se neuh neuh ngah tak thin a ni a. Liberal-ho thlawpna thin tihnun thar leh leh khawpui liana tlak nat leh theih nan nasa taka nawr tum a ni.