BJP Mizoram Pradesh President Vanlalhmuaka chuan Mizoram chu sangha khawi leh ran vulh lamah zau zawka hmalak theih a nih thu leh mi tam tak tan ran vulh chu eizawnna tling vek a nih thu Parshottam Rupala, Union Mnister of Fisheries, Animal Husbandry & Dairy a sawipui.
Pathianni khan Rupala chu New Delhi-a a chenna inah Vanlalhmuaka hian kawmin union minister chanpual department chhunga Mizoram mamawh hrang hrangte a sawipui.
Vawksaa Mizoram a intodelh theihna tur atana hma lakpui tur te, sangha khawi leh bawnghnute atanga thil siam lamah a intodelh theih nante hmalakpui turin a ngen.
Vanlalhmuaka hian Mizorama vawk pul hri leng avanga vawk vulhtute tawrhna leh harsatna nasa tak a thlen tawhte chungchang pawh sawipuiin, vawk vulhtu dik takten an vawk vulh an chân avanga zangnadawmna an hmuh ngei theihna tura hmalakpui zui zel turin a ngen nghal bawk.
Union Minister Rupala pawhin vawk pul hri avanga an harsatna tawh kawngah Mizoram sorkarin a lo thlen tawh angin tanpui zel a intiam thu BJP Mizoram president hi a lo hrilh a. A ministry chan hnuaia department hrang hrangte chu mipuiin eizawnna an neih theihna tur atan theihtawp chhuah chu a thil tum a nih thu te leh Mizoram mipuite a puih theihna atan kawng hrang hranga thurawn pe turin a lo hrilh bawk a ni.
Mizoram BJP President Vanlalhmuaka hian nimin khan Darshana Jardosh, MoS for Railway & Textiles chu a pisaah kawm bawkin Mizoram chhunga railway hnathawh dan tlangpui leh textiles industry lama Mizoram dinhmun a sawipui a. Mizoram a lo tlawh hunah a ministry chan hnuaia kuthnathawktute harsatnate enfiaha sutkian a nih theih nan hmalaksak turin a ngen a ni.
Vawiin hian Jardosh hi Mizoram tlawhin a lo zin dawn a ni.