Mizo rimawi ngaihthlakna tur Darbu application chu Zirtawpni zan khan Regency Hotel conference hall-ah an tlangzarh.
Darbu hi ‘Music & Audio application’ niin a thlawna Mizo hla ngaihthlakna a ni a, Mizo zaithiamte album thar hmun danga awm lo lei theihna leh zaithiamte merchandise zawrh chhuah theihna a ni.
App duangtu Darbu Team hian Mizo mipuiten kan Zo rimawi tha an ban phakah kim taka phochhuah a, rimawi a eizawng thinten an thiamna leh thawhrimna phochhuahna tur platform tha zawk an neih theihna tur kawng pakhat a nih beisei in Darbu hi an siam a. Darbu team hi IT lama mithiam, marketing expert-te leh music a tawnhriat nei thaten an thawkho.
Darbu CEO Lalrinnunga chuan, “Mizo zaimite leh rimawi a eizawngte tan tuna kan kalphung awm sa tibuai si lo hian kawng dang a la awm theih hi kan ring tlat a, chu chu zaninah kan dinchhuahpui.”
“He app hi Mizo mipuite, zaimite leh rimawi a eizawngte tan a hmasawnna bung thar a nih ngei kan beisei” tiin tlangzarhnaah a sawi.
“Platform pakhat ve mai kan ni a, mitin he app ah hian an leng vek. Midang belh tur neilo a mahni a rimawi tuipui em em, talent nei tha si te tan pawh kawng hawn kan tum.” tiin a sawi belh bawk.
Darbu in eng nge a tum?
Darbu app in a kalpui tur zinga hmasa ber chu Mizo mipuiten Mizo hla kimchang thei ang bera an ngaihthlak theihna tur; hla hlui leh album hlui te mumal taka dahkhawmna tura duan a ni.
Mizo rimawi eizawnna atana hmangten hlawkna tha zawk an hmuh theih phahna tura duan a ni a, Mizo rimawi khawvelah hmasawnna a nih ngei beisei in an siam.
Rimawi khawvel a eizawnna tlak thiamna nei, kal ngaihna hre silo te tana kawng thar a nih nan din a ni bawk.
Eng nge Darbu features?
Darbu application-ah hian thil chi hrang hrang awm dawn mahse langsar pathum a awm. Chungte chu Darbu Library, Darbu Exclusive Release leh Darbu Store te an ni.
Darbu library hi ‘streaming platform’ a ni dawn a. Mizoten kan hriatlar – Spotify, TouTube Music te ang tho niin hetah hian Mizo hla tam thei ang ber mipui tan a thlawn a ngaihthlak theihin a awm dawn. Hla thar bakah hla hlui tam thei ang ber ri tha zawka ngaihthlak theih tura ‘remaster’ hnuah dah a ni a. Heng hlate hi phalna nei a dah thlap an ni.
Darbu Exclusive Release-ah hian zaimiten album thar an release a nih chuan Darbu App-ah hian an zuar anga, he app-ah hian a lei theih ang. Darbu a release hla hmundangah ngaihthlak tur a awm dawn lova, copy chhawn theih a ni dawn lo. Hei vang hian album siamtu hnenah hlawkna a kal dawn. Hemi atanga sum lut hi artist-ten 90% an chang a, Darbu in 10% an chang ve ang.
Darbu app hi ‘piracy’, phalna lova lo tihdarh leh thildang laka a him nan ‘encryption’ uluk tak a kalpui a ni a. He app atang hian eng hla mah a lakchhuah theih loh.
Darbu Store-ah hian artist-ten an kutchhuak emaw bungrua eng ang chi pawh Darbu App katlangin an zuar thei ang. Anmahni in merchandise nei tura hma an la thei lo a nih pawhin an duhdan anga design pui in, artist te tana hlawk tur si, a hranpa a an buaipui ngai si lo in Darbu hian a zawrhsak dawn bawk.
International shipping partner an neih bawk avangin khawi hmun atang pawhin a lei theih dawn.
Darbu app hi App Store leh Google Play-ah te iOS leh Android hmangte tan download turin a awm ve ve tawh. Tun dinhmunah artist 264 atangin Mizo hla 1280 chuang a awm mek a, nitin hla hi dah belh zel a ni.