India khawpui, Delhi chuan hun eng emaw chen khaw lum uchuak tak an tawrh hnuah Thawhtanni tuk khan ruah tam tham tak an dawng a, hei hian khua a tidai a, hetih rual hian hmun tam takah power neih loh phah an tam hle.
Ruah tam tak sur hian Delhi International Airport-a thlawhna lut leh chhuak tur pawh a tibuai a, khawpui chhungah lirthei kal pawh a tangkhan phah nasa hle.
Delhi leh India hmar lam hmun eng emaw zat chuan March thla atang tawh khan khaw lum uchuak tak an lo tuar tawh a ni.
Tun thla tir lamah khan khawpui berah hian hmun thenkhatah chuan khaw lum lam hi 49.2°C lai pawh a kang hman.
India Meteorological Department (IMD) chuan Thawhtanni khan tun kar chhung hian ‘zau takah ruah a sur dawn’ tih sawi lawkin hei hian Delhi, Punjab, Haryana, Chandigarh leh Uttar Pradesh a huam a. Ruah hi western disturbance an tih, Mediterranean vel atanga ruahtui pai thli kal leh thlivir inmung vang niin a sawi.
Thawhtanniah hian Delhi leh a chhehvelah hian ruah tam tak leh thli pawh darkar khata km 70 vel thlenga chak a thawk a ni.
IMD hian Delhi-ah hian khaw lum lam chu 11°C zetin a tlahniam tih sawiin zing dar 5.40 leh dar 7:00 inkarah khan 29°C atangin 18°C-ah a tla hman tih an sawi.
Hei hi tun thla chhunga khawpui bera khua a vawh ber t\um a ni a. Khawpui chhung bakah hian a chhehvel hmun dangah pawh kartawpah khan ruah tlem a lo tla tawh bawk.
India hmar lamah hian kuminah hian nipui a thaw hma hle a, mi maktaduai tel, khaw luma intihdaihna tur leh tawmna hmun tha nei lote khawsakna a buai phah hle.
India-ah hian khaw lum uchuak tak hi May leh June velah chuan thil thleng pangngai a ni a; mahse, kuminah hian March atangin a intan a, hemi thla bika khaw lum lam chawhrual pawh kum tam tam chhunga a san ber tum a ni.
Delhi hian March leh May inkarah ruah vawi li emaw chauh a dawng a, a dan pangngaiah chuan vawi 12-14 vel a ni thin tih IMD chuan a sawi.
Thawhtanni tuka ruah a sur pawh hian Delhi-a cheng mi tam tak chuan rei tak an nghah tawh lo thleng chu lawmin social media-ah an tar lang nasa hle a ni.
Weather forecaster Skymet Weather-a Chief Meteorologist Mahesh Palawat chuan India hmar lam hian khaw lum uchuak tak an tawh a beiseiawm chiah tawh lo tih Twitter-ah a tar lang ve bawk.