Petrol vang karah hian inrenchem i zir ang u
Kan state thenawm Assam leh Meghalaya in nasa takin khuarel chhiatna an tawk a, ei leh bar lakluh kawngah harsatna deuh tawkin lang mah ila, nasa erawh a ni lo. Hetih lai hian oil phurtuten harsatna an tawk nasa zual thung a, kan inrenchem thiam erawh chuan buaina kan nei dawn lo thung tih i hre hlawm ang u.
Sorkar chuan petrol la turte tan department hriatpuina lehkha lak a ngaih thu an chhuah a, diesel erawh free sale reng a la ni thung. Lirthei a pung a, petrol-ah harsatna kan lo tawk a nih pawhin inrenchem tum ila, tun hi zirlai thar zirchhuah nan hman tum hlawm teh ang u. Duham lo ila, chiai lo bawk ila, kan ngheiin a rinawm loh a ni.
Sorkar in Guwahati lama oil la tura a tirhte an lo thleng zel a, lo la thleng tur an awm reng bawk. Duham leh chiai vanga la khawl nghek nghek lovin mamawh chin motor-ah thun mai ila, midangte nen kan inkenthiam leh peizawn thiam phawt chuan buaina tur a awm lo tih kan hriat a tha.
Supply dept. hotute chuan rel kawng leh kawngpui chhia avangin petrol chawk luh chu mumal lo mah se sorkar hmalaknain tam tham vak lo chu phurh luh reng a ni tih an sawi a, “Guwahati-a petrol phur tanker-te an rawn thleng zel a, petrol la tura thang mekte pawh an awm,” an ti. Guwahati atanga petrol chawk luh a awm reng a, chungte chu inrenchem taka semzai a nih zel chuan harsatna lian tham tak Mizoramin a tawh loh an beisei tih an sawi bawk.