- Zirsangkima
…ngai eng ang mah se, an ngai thei tawh tlat lo!
………
An hnam chu ‘Hnam’ tia chhàl theih pawh a ni ta lo—an darh sung tawh! An ram chu naménin a buai lo a; mipui rorèlna hnehchhuh tumin sipai tha chakna hmangin an han bei tehrêng a ni a. Anni chuan he hming chhe tak mai, ‘Rál tlãn’ tih hming put hi an hreh thei tawh lo! Duh lo mah se, an put a ngai tawh!
Sáwtah te, khútah te, hetah Mizoramah te an rawn tlãn tak dàwr dàwr a. Sikul hrang hrangah paw’n rál tlãn zirlai an nei fur. An in loah, an véng loah, an khua loah an rawn khawsa ve tak nâw nâw a nia! Â-u Huma sawi ang deuhin, ‘Khawsak loh ngawt a theih ngawt si lo a, kan khawsa ve nãw nãw a ni e,’ a tih ang deuhin ‘nãw nãw’ deuhin an khawsa ve nãw nãw mék a ni—an ram loah!
Ei an lo zawn ve thinna te, an lo, an buh leh bãl, ni tina an kài ve thinna an pisa te kha … ngai ve tùr chu an ni—mihring ni ve miau hek! Mahse, ngai eng ang mah se, an ngai thei tawh tlat si lo! Ngai thei loa siamtu chu an va’n runthlâk tak!
~
Tûkin chu, he ka huanga mi tùr ka ziah lai min ti tàwp tawpin, a thara thu ziah duhna hlâ ka’n ngaithlâk roh chu le!
Facebook ka hawng dêk dêk a, Chin kan unau lam atanga ráltlãnte zai ka ngaithla a. David Lal inti chuan ka hla duh êm êm mai, Michel Bublé hla, ‘Home’ kha a rawn sa chhãwng (cover) pek a! Matric pass tharte puala ka thu ziah sâ min rawn phehsak ta a nih hi maw le! A pawi lo e.
He hlaah hian an nu/a nupui a ngaih avànga ina hàw a châkzia a sawi a. Khawpui lùn leh hulùm Paris leh Rome-ah pawh awm mah se, a rilru chu a ‘My Dear-i’ kianga a awmzia te kha aw… Vawng vawngin a ngaihnawm!
Mahse, David Lal-a’n he hla a sak hmaa thu hmá a neih nèn kha chuan a hla sa lãrtu sak chhan nèn a inpersan hle a; a nat pawh a na ngâwih tak zet zâwk! Tùna mi, mahni in leh lo, an pisa, an ei zawnna, an ram chhuahsan mi 4,40,000 te hian an in kha an ngai zâwk daih asin! Kha an in, lung dama an chènna kha an ngai a nia…
Bublé-a’n ‘May be surrounded by
A million people
I still feel all alone
Just wanna go home
Oh, I miss you, you know…’ a tih vawng vawng ai mah hian, an khawsak phung, an in leh lo kha an ngai zâwk hian ka ring nia!
A cháng chuan ‘mahni ang lo’ ni paw’n an inhre fo ang—kan unau rál rawn tlãnte hi! An han tho phat ang a, an hmuh thin ang hmuh tumin an han inngai ang a; an chaw ei huna ei in siam tùra inngai khâ—‘Rál tlãn Báwm’-a khung an lo ni leh si ang a! Duh leh tum lâwk rêng vàng pawh ni loa, mite chan tùr, mite tawrh tùra riaka an ngaih thin kha, an chungah a tla ta si a! Awi ka nu! Páwn an han chhuak a, engkim a lo fel fai mai si an han hmuh hian, an ram an ngaihna leh an huatna a inzah thiak hian ka rinsak ve.
And I feel just like
I’m living someone else’s life
It’s like I just stepped outside
When everything was going right
Ngaih an nei—an ram, Myanmar—an zalênna thinna ram chu! Chu erawh chu ngaih ngawta thil chin fela hàw ngawtna chi a ni si lo! An va khawngaihthlâk tak! Politics thil a nih avàngin eng an tih mah a sâwt tawh si lo!
An fate lah chuan Mizo tawng inzir chawpin hetah, kan hmunah sikul an rawn kai a nia. An dinhmun hriaa hmusita endawng thei zia rêng kan ni lo. Dik tak chuan an rama hàw a, an sikul ngaia zalèn tak kài leh kha an thlahlel ve asin! Mahse, an thei si lo!
Tanpuitu min àu a, ‘Tanpui ngaite tanpuitu’ ti thin YMA ten an aupui thin hi kan zàwm ve dáwn lo’m ni? Hmusita diriam tùrin eng nge ka nih bîk? ‘Anni tùamhlàwm hi ka Mizona a ni,’ i ti ngam ang u.
A dika dik chuan hàw an châk! An in an ngai. An kawta pipu insuiha uai pawh naupangte hian an thlahlel a, an la mithhlà reng asin! An bialnu an kalsan tâkte nèn khan eng tin tak inbe zui ang imaw? A thi tawh ang em? A la dam chuan … ngaihtuah zuipui la—an ina hàw an châk tùrzia mai chu! Mahse, an thei rih si lo!
Let me go home
I’ve had my run
Baby, I’m done
I gotta go home
Let me go home
It’ll all be all right
I’ll be home tonight
I’m coming back home
– ‘Home’ by Michael Buble