AC Milan in an club chanchin a Serie A title vawi 19-na an chawi a. Kum 11 hnua an champion leh hmasak ber ni turin season khar ni ah Sassuolo lakah hnehna an chang.
Mapei Stadium a inkhelah Olivier Giroud chuan Milan tan goal hnih a khung a, Franck Kessie chuan goal khat dang a khung.
Milan in trophy an chawi hi manager Stefano Pioli chuan manager a nih hnua trophy a chawi hmasak ber a ni a. kum 2019 khan Italian coach hi Milan in an lalut a, a hna a thawh tan tirhin mipui lawm a hlawh lova. Hei hi an hmelma Inter Milan thla ruk chhung a lo enkawl tawh vang a nih bakah Italian football a hming langsar ber a nih loh vang a ni.
Nimahsela tun season-ah Inter Milan nena an intlansiaknaah chesual miah lovin a tawp thleng an tang a. Inter hian point hnih a pha lovin season khar ni hian 3-0 in chak ve tho mahse Milan an umpha tawh lo.
Milan thawhlehna a ropui
Kum 2011 a Massimiliano Allegri hnuaia Serie A an champion hnuah Milan in league champion in an chawi thin Scudetto an chawi leh tawh lo. Hun hrang hrang an paltlang zingah awlsam lo tak tak awmin kum 2018 khan club neitu Li Yonghong chuan leiba a ngah avangin club a tluchhe teuh a, Elliott Management Corporation in la chhawngin an him hram.
Milan hian Clarence Seedorf, Filippo Inzaghi, Sinisa Mihajlovic, Vincenzo Montella leh Gennaro Gattuso te hnuaiah team tha din a hlawhtlin tumin bei thin mahse an ti fuh hleithei lova. Kum 2019 October thla khan Stefano Pioli hi an lalut.
Pioli hi hma hun thui zawk thlir chunga Milan in an lakluh a ni lova, coach nghet tur an dap laia team talbuai tur lo siamtha tura lakluh a ni.
Kum 2019 December-ah Atalanta lakah 5-0 in an mualpho a, hemi season an khar dan chhe lo mahse Pioli hi thlak thuai tura ngaih a ni a. German coach Ralf Rangnick chu Milan siamtha turin CEO Ivan Gazidis chuan a be hman tawh.
Pioli hnuaiah erawh hmasawn lam an pan a, Covid 19 avanga season chawlh hnua an chhunzawm lehin a zawnin match 10 tlawm lovin an khel a, Rangnick lakluhna chu kalpui lovin Pioli contract pek an thlang a, an ti fuh.
Technical director Paolo Maldini nen an thawhdunna a tha hle a, Milan legend hi player lakluh lamah a che tha bawk.
Denmark captain Simon Kjaer loan a hawh phawtin a hnuah an leinghet a, kum 33 mi hi an tlarhnung thlak danglamtu a ni. A inhliam laiin Euro 480,000 a an lakluh Pierre Kalulu a tangkai a. Chelsea a khelhna hmun chang lo Fikayo Tomori a pawimawh bawk.
Goalkeeper Gianluigi Donnarumma leh a agent Mino Raiola ten sum tam tak an phut chu an pe duh lova, a thlak tur atan Mike Maignan chu Lille atang an lalut a, Italy a goalkeeper tha ber a ni mek.
Beisei angin Sandro Tonali-a’n Milan ah bul tan lo mahse kum 22 mi in tun season-ah hma a sawn a, Pioli-a’n AS Roma legend Daniele de Rossi nen a tehkhin der tawh.
Kum 2019 a Lille atanga Euro maktaduai 23 a an lakluh Rafael Leao chuan tun season-ah goal 11 khungin Serie A Most Valuable Player a thlan a ni.