AIZAWL: Lawngtlai district-a puaktheithil hman phalna nei (explosives licence holder) leh silai leh a mu zuar (arms & ammunition dealer licence holder)-te chu nimin khan Lawngtlai dist. Addl. DC James Miahlung hovin an ṭhukhawm a. Dan leh hriat tur pawimawh te inhrilhhriain an sawiho bawk.
Lawngtlai dist. Addl. DC chuan sorkar laipui thuchhuak bawhzuia ṭhutkhawm chu koh a nih thu sawiin, puaktheithil leh silai chu a duh tana hman sual theih leh pawikhawihna atana hman theih, ram chhung ralmuanna tichhe thei a nih avangin licence holder te mawhphurhna a sang hle tih a sawi a. Fimkhur a ṭul zia sawiin, danin a phal chin leh dan ang taka an licence chu hmang turin a chah.
Lawngtlai SDPO Beimosia Lapi chuan Explosives acts, 1884, Explosives rules, 2008 leh Explosive substances act, 1908 te sawifiahin, puakthei thil leh silai hman leh zawrh chungchanga hriat tur pawimawh leh dan bawhchhia hremnate a sawi a. Sub-Deputy Commissioner H. Vanlalbiakzauva’n office aṭanga licence an pekchhuah ṭhin dan te a sawi bawk.
He thutkhawmah hian Licence holder te chu an licence original copy kenga kalkhawmin, an stock dinhmun an report nghal a. Lawngtlai dist-ah puaktheithil hman phalna nei (explosives licence holder) mi 14 awm mekin, Silai leh a mu zawrh phalna nei (arms & ammunition dealer licence holder) mi 2 an awm mek bawk niin sorkar thuchhuah chuan a tarlang.