Aizawl: MNF Adviser Dr R Lalthangliana, health minister ni bawk chuan sorkar hmasain health department-ah hna lak a lo neih mumal loh avangin hna ruak 3,000 dawn a awm phah tih a sawi.
He thu hi nimina MNF party-in an office, Mizo Hnam Rûna chhung inkhawm an neihah a sawi a, hna ruak hnawh khat turin chief minister hovin ngaihtuahna an seng a, sorkarna an chan tirh, 2019-ah post ruak 734 la turin Rs. vbc 50 an dah fel thu sawiin, “Finance pawhin pawm fel tawh mah se Covid-19 leng avangin hna kan la thei ta lo,” a ti.
Loh theih loh avanga health bika hna ruak hnawh khah tur chu tun hnai maia an rel thu sawiin, tunah erawh dil mai chi a la ni rih lo a, a tlem berah pawh thla 3/4 lai a fel hun tur la nghah ngai dawn tih a sawi.
Dr Thangtea chuan Covid-19 leng karah health department bikah pawh a theih ang anga hna an thawh thu sawiin, Civil Hospital, Aizawl-ah ICU an siam belh a, tunah nausen ICU tur an siam belh leh mek tih a sawi.
District zawng zawngah oxygen khawlpui an din fel tawh thute, ZMC-ah khum 400 chuang a awm tawh thu leh Cancer Super Speciality Hospital lian din tura hma an lak mek thu a sawi a, “Chief minister hova kan ngaihtuah ber chu nakina kan tu leh fate thlenga kan chhawr theih tur hi a ni,” a ti bawk.