Ultimate Fighting Championship chuan tunhnaia ‘fight’ pui leh mipui barakhaih ber zing ami a vawi hnih nan a buatsaih leh dawn a. UFC 277-ah women’s bantamweight title rematch a siam dawn.
Champion lai Julianna Pena chuan December thla khan UFC 269-ah Amanda Nunes chu rin loh takin a hneh a. Ding chunga inbeihnaah Nunes chu kutthlaka a tihbuai hnuah chhuat a inbuanah hneh zawkin submission hmangin a chak.
July 30 hian Dallas-ah UFC 277 hi neih a ni dawn a, American Airlines Arena-ah fighter pahnihte an intum dawn.
UFC 269 a Pena hnehna chan hi MMA chanchin a beisei loh result lian ber zing ami niin an sawi thin a. UFC president Dana White ngei pawhin kum 2007 a Matt Serra in Georges St-Pierre a barakhaih nen an inang niin a sawi hial.
Nunes hi kum 2014 hnua a tlawm hmasak ber a ni a, bantamweight title vawi li a humhim hnuah a hloh a, UFC featherweight champion erawh a la ni mek.
UFC 277-ah hian interim flyweight title inchuhin Brandon Moreno leh Kai Kara-France te an intum ve dawn bawk.