Arsenal midfielder Mohamed Elneny chuan hun engemaw chen a hma hun a chian loh hnuah contract thar a ziak a, Emirates Stadium-ah a cham zui zel dawn.
Egypt midfielder hi tun nipui a contract hmang zo tur a ni a. Tun season-ah Thomas Partey inhliam laiin an midfield-ah player tangkai a ni a, Gunners in chelh zui zel an thlang.
Kum 29 mi contract ziah hi kimchang a puanzar ni lo mahse kum khat contract niin kum khat dang ziah belh theihna a awm.
Kum 2016 January thla a Basel atanga Gunners zawmtu Elneny hian an tan vawi 147 a inkhel tawh a, goal nga khungin assist vawi 10 a nei tawh a. An midfield tikhawngtu zing ami a ni.
Ram tana vawi 93 inkhel tawh Elneny chuan, “He club hi ka hmangaih a, heta inkhelh chhunzawm zel hi ka duh a, kan hma hun thlirin beisei sang tak ka nei.” tiin contract a ziah hnuah a sawi.
Gunners boss Mikel Arteta chuan, “Mo hi team-ah mi pawimawh a ni a, player naupang zawkte tan entawn tlak a ni a. Kan hnena a cham zel tur hi ka lawm hle.” a ti ve bawk.
Gunners hian an tlarhma tihchakna tur an melh mek a, tun nipuiah an striker pahnih Alexandre Lacazette leh Eddie Nketiah te contract a zawh dawn avangin forward an dap nasa hle.
Manchester City atangin Gabriel Jesus lakluh dan an zawng mek a, Napoli striker Victor Osimhen nen sawizawm an ni tel.
Napoli in Euro maktaduai 70 a an lakluh kum 23 mi Osimhen man hi to dawn mahse Arsenal in inremna neih theih an beisei a. Osimhen hian tun season-ah inhliamin tibuai mahse match 32 atangin goal 18 a khung thei a ni.