- Ruata
India ram leh Mizoram thleng pawha sub-compact SUV chhuak tawhah chuan mite lei tam leh kan hmuh tam berte zinga mi Maruti Suzuki Brezza leh Hyundai Venue chu tunah hian a chhuan thar (new generation model) tichhuak turin company pahnihten hma an la mek a, tun atanga reiloteah kan hmuh tawh hmel a ni.
New Generation Maruti Suzuki Brezza
Maruti Suzuki Brezza chhuak thar tur hi dealership thlan bik thenkhatah chuan a book theih tawh a, Rs. 5,000 a book theih a ni a, a man tur hi June thla kar tawp lamah company lamin an puanchhuah beisei a ni.
Maruti Suzuki Brezza tharah hian a khawl, a pawn lam landan leh a chhunglamah inthlak a awm nual dawn a. He SUV thar turah hian 1.5 litre K15C khawl an rawn hman tir dawn a. Hei hian a khawla cylinder khat zelah injector pahnih a nei dawn a, a tui ti hehlo tu tha tak a ni dawn niin tarlan a ni. Transmission lamah pawh 5 speed manual bakah a thar, 6-speed torque converter automatic gearbox te a hmang dawn a, CNG hmang Brezza hi chu a tlangzarh hnulam deuhah an tihchhuah beisei a ni bawk a ni.
Design lamah hian 2022 Brezza thar lo chhuak tur hian grille design thar, headlamp thar, bumper design khawih danglam hret, matte black cladding, dual tone alloy wheel design thar leh taillamp cluster duan thar te a rawn nei dawn a ni.
A chhunglamah hian dashboard thar hlak bakah 9.0-inch touchscreen infotainment system, SmartPlay Pro+ interface thar awm tel, Apple CarPlay leh Android Auto connectivity keng tel bawk te a nei tawh dawn a. Hei bakah hian wireless smartphone charging, 360 degree camera, instrument cluster thar, connected car tech flat bottom steering thar, te a nei tawh ang a, a chhunglam an siamna hmanrua hi a hma aia changkang leh dak nalh zawk a nih beisei a ni bawk.
Himna lamah chuan tuna chhuak mek aiin an dah belh nual hmel bawk a. Heng zingah hian airbag paruk, hill hold assist, hill decent assist leh tyre pressure monitoring system te tura beisei a ni.
2022 Hyundai Venue
Hyundai India pawh an sub-compact SUV lar leh lei hlawh em em Venue chu kum 2022 model tichhuak turin an inpuahchah mek a, hei pawh hi thlalehah chuan a chhuah hman beisei a ni tawh a ni.
Hyundai N-Line lirthei hoah pawh Venue hi kan hmuh belh leh hmel bawk a. Hyundai Venue lo chhuak thar leh turah hian design leh pianphungah thlak danglam tlem a awm ve hmel a, a khawl lam erawh a ngai a ni dawn a. Brezza ang bawkin dealership thenkhatah Venue thar tur hi a book theih tawh tho a ni.
A design thlak kan han tih hi a hmalam leh hnunglamah a nih ber hmel a, hei hi khawvel huapa Hyundai design inang tlang ang thei ber tura duan thar a ni. Venue thar hian Hyundai design neih thar Sensuous Sportiness an tih design a rawn nei tawh dawn a. A hma bawrah hian parametric grille lian tha tak leh bumper design thar kan hmu ang a, hei bakah hian split headlamps, LED DRLs & fog lamp chu a chhuak meka mi a rawn la chhawm hmel a ni. Venue thar hian alloy wheel design thar hlak a rawn nei ang a, hei bakah hian a hnunglamah taillamp thar leh bumper thar a nei dawn bawk.
Hyundai Venue N-Line bik hian a hnuai lama rawng sena chei, red accent an tih ang chu N-Line lirthei dangho ang bawkin a rawn nei ang a. Alloy wheel design hrang bik te, N-Line badge, exhaust hmawr pahnih te, leh thildang dangah a danglam bik dawn a ni.
2022 Hyundai Venue facelift lo chhuak tur hian touchscreen infotainment system hlai zawk, Android Auto leh Apple CarPlay connectivity awm tel a rawn nei ang a. Heng bakah hian ventilated front seat, 360 degree camera, Bose audio system, front parking sensors leh adangte hi a kentel hrang hrang tur zingah a rawn tel beisei a ni bawk. Hei bakah hian airbag paruk, tyre pressure monitoring system, rear parking camera, air purifier, connected car tech leh electric sunroof te hi a la neih chhunzawm zel dawn bawk a ni.
A khawl chu a ngai a la nih hmel a. 83PS power pechhuak thei, 1.2 litre naturally aspirated petrol khawl leh 120PS power pechhuak thei, 1.0 litre turbo petrol khawl bakah 100PS power pechhuak thei, 1.5 litre diesel khawl te a rawn la neih chhunzawm hmel a ni.