France leh Germany rem hruaitute chuan Russian hruaitu, Vladimir Putin chu hmaichhana Ukrainian president nena inbe turin an nawr tih German chancellor pisa chuan a puang.
Emmanuel Macron leh Olaf Scholz te pahnih chuan Putin-a hi phone-in minute 80 zet an be dun a ni.
‘A hma thei ang bera inkahhai kalpui tur leh Russian sipaite hnukkir turin an nawr’ tih chancellor pisa hian a puang.
Russia hruaitu hian Moscow chuan Kyiv nena inbiak chhunzawm leh an inpeih reng niin a sawi tih Kremlin chuan a tar lang ve bawk.
Dawhkan pakhat kila Putin-a leh Ukrainian President Volodymyr Zelensky-a inbe turin an inhawng tih erawh sawi chian a ni chuang lo.
Ukrainian president hian a hmain inbiak chu a châk lem lo tih a lo sawi tawh a; mahse, an buaina erawh chin fel ran erawh tha a tih thu a sawi thung.
Russia-in February 24 atanga a rûn hnuah Russian leh Ukrainian palaite chu vawi eng emaw zat an lo inbe tawh a; mahse, an buaina tireh khawpa indawrna erawh an la kalpui lo.
France leh Germany hian Putin-a hi Mariupol-a Azovstal steelworks-a indonaa mi tang tia Ukrainian fighter 2,500 an hren mekte chhuah turin an ti bawk.
Chhim lama lawngchawlhna, Mariupol-ah hian factory hi Ukrainian sipaite tankhawhna hnuhnung ber a ni a. Russian-te nasa taka beia an bomb hnuah thununin tunah chuan chhiain a awm mek a ni.
Tun thla tirah khan Moscow thuneitute chuan plant vengtu fighter-te chu an inpe tih an puang a, President Zelensky erawh chuan chhuahsan zawk mai tura phalna an pek avangin an kalsan niin a sawi ve thung.
Russia hian a hmain Russian-te ram luah, Donetsk-a Olenivka thingtlang khuaa lung in hlui chu hawngin fighter 900 chuang an dah luh thu a sawi tawh a. Mi tlema zawng hliam tuarte chu Donetsk thova Novoazovsk-a damdawi inah dah an nih thu a sawi bawk.
Ukraine chuan mi tang inthleng tawnnaah an chhuah mai an beisei a, Russia erawh chuan chutianga tumna a awm leh awm loh engmah an la sawi lo thung a. Russian MP-te chuan fighter-te hi an chungthu rel emaw, tihhlum emaw ni se an duh tih an sawi.
French leh German hruaitute hian Putin-a chu Ukrainian lawngchawlhna, Odesa an dang bet tlat phelh tur leh thil thawn chhuah theiha hawng turin an ti bawk.
Kremlin chuan Putin-a hian khawvelin ei tur a mamawhte thawn a nih theih dan tur a lo enpui tur thu a sawi a, hetih rual hian khawthlang ramten an hrekna phelh a phut ve bawk niin an sawi.
Russia hian France leh Germany ram hnihte hi Ukraine hnena ralthuam an pek thin titawp tura tiin an ti zel a nih chuan buaina tipunluntu mai a nih theih thu a sawi.