Passenger phur thlawhna tê chi, Nepal-a mi mal enkawl airline thlawhna, mi 22 phur chu a chin hriat lohva a awm hnuah a tla tih hriat a ni.
Indian pali chuanna, Tara Air thlawhna hi zing dar 9.55-ah Pokhara atanga thlawk chhuak niin minute 15 hnuah control tower-in a bepawp thei lo zui niin airline thupuangtu chuan a sawi a. A hnuah Kowang khuaah thlawhna tla hi an hmu ta a ni.
Army thupuangtu, Narayan Silwal chuan, “Tual chhung mite hnen atanga kan hriat danin Tara Air thlawhna hi Lamche lui hnar, Manapathi Himal lei minna hnuaiah a tla a. Nepal Army chuan lirthei leh thlawhnain a hmun hi an pan mek,” tiin ANI a hrilh.
Twin Otter 9N-AET thlawhnaah hian Indian pali, Mumbai-a mite bakah German pahnih leh Nepali 13 an chuang niin airline thupuangtu chuan a sawi.
Airline-in mi chuangte hming a tihchhuah atangin Ashok Kumar Tripathi, Dhanush Tripathi, Ritika Tripathi leh Vaibhawi Tripathi te chu Indian an ni tih hriat a ni.
An ram khawthlang lama tlangrama Jomsom Airport-a chawhma dar 10:15-a tum tur a ni.
Aviation chuan Pokhara-Jomsom air route-a Ghorepani chunga an awm lai atangin an bepawp thei lo tan niin an sawi.
Jomsom Airport-a air traffic controller chuan Jomsom-a Ghasa atangin thawm bengchheng tak chu an hriat thu a sawi.
Nepal sorkar chuan a chin hriat loh a nih veleh Mustang leh Pokhara atangin a zawng turin mi mal helicopter pahnih a tir chhuak a. Nepal Army leh police pawhin hmun hrang hrangah an zawng zui nghal bawk niin thuneitute chuan an sawi.