Nigerian police chuan an ram chhim lam, Port Harcourt-a mipui innek buaina thlenga mi 31 zet an thihna chu an chhui mek tih an sawi.
Kohhran pakhatin mi retheite hnena ei tur a semna khelmuala Inrinni tuka he chhiatna hi thleng niin a hma zan zankhuain mi tam takin tlaivarin an nghak nghe nghe.
Mipuite chu an thil sem chan tuma nasa taka innek buaiin a huaihawttute chuan an thunun thei ta lo niin police chuan an sawi.
Thi zingah hian hmeichhia leh naupang pawh an tel.
A hmutute chuan luhna lam pana an kal chu hnung lam atanga an innawrna avangin thenkhat an tlu a, chil zui an ni ta niin AFP news agency hnenah an sawi.
“Mipuite chu, ‘Hnungtawlh rawh u, hnungtawlh rawh u,’ tiin an au nasa hle,” tiin Chisom Nwachukwu chuan a sawi a. “Mi thenkhatin a hnung atangin an rawn nawr a ni,” a ti.
Venhim hnathawktute leh emergency service-te chu thunun turin koh an ni a. Hliam tuarte pawh Port Harcourt-a sipai damdawi inah dah an ni.
King’s Assembly Church chuan thil thleng chuan a tihrehawm hle tih an sawi a, mipui himna tur leh thunun dan an kalpui chu an ennawn dawn tih an sawi.
Kum 2014 atanga kum tin tun ang hun an buatsaih thinah hian kuminah hian an beisei ai leh kum dang zawng aiin mi an tam niin an sawi a, thenkhat phei chu security team an thlen hmain a hmunah hian an lo awm lawk tawh tih an sawi.
Rivers state police commissioner, Eboka Friday chuan sakhua leh mi tanpuitu pawlte chu nakin zelah hetiang an huaihawt leh dawn a nih chuan mipui thunun tur leh venhimna atan police thawhpui turin a ngen.
Police-in an chhui mek bakah hian tual chhung sorkar chuan Inrinni tuka thil thleng chhui tur committee an din tih Rivers state governor Nyesom Wike chuan a sawi.
Nigeria-ah hian tun hnaiah hetiang chhiatna lian tak tak hi a thleng tawh thin a. Nikum pawh khan tanpuitu pawl pakhatin ei tur an semna, Borno state-ah hmeichhia pasarih chil hlum an lo ni tawh bawk.
Port Harcourt hi Nigeria-a tuialhthei hmunpui a ni a, tuialhtheiah hian hausa hle mah se an rama cheng 40% chuang hi mi rethei huanga awm an ni.