Aizawl : BJP Mizoram Pradesh President Vanlalhmuaka chuan, “Mahni hminga zangnadawmna (compensation) la ngam si lo, mi hming hawha zangnadawmna lak teuh tum Minister leh MLA te hian Mizoram an ei chhe mek a ni,” a ti.
He thu hi nimina BJP Mizoram Pradesh in an pisa-a Friday Political Session neihah Vanlalhmuaka hian a sawi a. Central Minister pakhatin Mizoramah kawng tha pek min tum mah se ram neitu sorkar chuan kawng tha aiin zangnadawmna an duh a, hmalakna a chak thei lo tih a hrilh thin chu a mualpho thlak hle tih a sawi.
Vanlalhmuaka hian MNF an sorkar apiang hian dan (constitution) in awmzia a nei thin lo chu pawi a tih thu a sawi a. MNF an sorkar apiangin Autonomous District Council (ADC) sorkarah buaina a thleng zel tih sawiin, “Dan pawngsualna hi ramin a chhiat phah thin a ni,” a ti a. Mizoramah dan awmze nei leh dan anga hmalakna a kal theihna’n BJP an pawimawh tih a sawi.
BJP State President Vanlalhmuaka hian central leh state-a BJP sorkarnaah manifesto anga hma lak thin a nih laiin, Mizoramah erawh sorkarna chelh mek MNF kaihhruai hian manifesto ang lo hlirin an kal thung tih a sawi a. “MNF in an manifesto te chu an sawi dal telh telh thin a ni. Chuvangin, sorkar rinawm loh kan hrawn avangin Mizoram hian harsatna tam tak tun hunah hian kan tawk mek a ni,” ti.