Aizawl : Rural Development Minister Lalruatkima’n Mizoram Rural Livelihood Mission (MzSRLM) atangin Rural development block 26-ah hmalak mek a nih thu leh Aizawl leh Lunglei district-ah pawh bultan a nih thu a sawi.
MzSRLM atanga hmeichhe chawikanna tura hmalakna hnuaia Self Help Group (SHG) te hnena community fund semchhuahna Thingdawl community hall-a neihah he thu hi RD Minister chuan a sawi a. Eizawnna chu inelna huang zau tak a nih avangin hlawhtling tur chuan midangte aia inpekna leh taimakna neih a pawimawh thu a sawi.
RD Minister chuan SEDP kalpui tan mekah mahni tuina leh dinchhuahpui ngei tur trade thlang thiam turin kalkhawmte chu a chah a. Khawvel hmasawnna in a ken tel social media hman kawngah inzir thar leh fimkhur a tul thu a sawi bawk.
Sekibuhchhuak cluster level federation hnuaia Village organisation 6-a SHG 19 hnenah leh Intodelh cluster level federation hnuaia Village organization 4-a SHG 8 te hnenah Community fund, a vaiin Rs. nuai 47.5 semchhuah a ni a. SHG member 6 te hnenah pawh Community enterprise fund Rs. nuai 5.53 sem chhuah a ni.