Aizawl: Mizoram MP (Rajya Sabha) K Vanlalvena chuan sakhaw hruaitu thenkhatte chu Pulpit/Maicham atang Pathian ruat roreltute hi sawisel fo tawh lo turin a ngen tih a sawi.
Mizo Hnam Run chhung inkhawm nimina neihah MP (RS) hian, “Pathian ruat loh roreltu an awm ngai lo a, tuna Zoram kaihruai tur hian Pu Zoramthanga hi Pathian ruat a ni, tih hi kan sakhaw hruaitu thenkhatte hian lo hria se ka duh a ni. Hun a tih loah chuan kan CM hi Pathianin a chawlhtir lo ang. Pulpit/Maicham atang hian Pathian ruat roreltu hi sawisel fo tawh lo turin ka ngen a ni,” a ti.
K Vanlalvena hian Covid-19 leng avangin an manifesto leh SEDP an intiamna tam tak bakah, development tam tak an thawh tur an tihhlawhtlin zung zung theih loh thu a sawi a. “Inthlan hmain manifesto tam tak kan nei a, SEDP pawh kan sawi nasa a. Mahse, kan hriat lawk miah loh Covid-in kum hnih chuang zet khawvel min nuai a,” tiin, Covid-19 hripui leng lo se hna tam tak an thawh tawh tur thu bakah hri leng karah MNF ministry hian nasa takin hna a thawk tho tih a sawi.
MNF party hotuten MP atan an ruat chu phu loh a tih thu leh a pian hmaa ram leh hnam tan MNF hotuten an lo beih nasatziate zahawm a tih thu a sawi a. A theihna zawnah Mizoram tan theihtawp chhuaha hna thawh a tum thu a sawi bawk.
Mizo Hnam Run chhung inkhawm hi C. Zahmuaka (Ex Parliamentary Secretary), Adviser MNF Gen.Hqrs. in a kaihruai a ni.