Aizawl khawpui bawlhhlawh sawngbawlna hmun, Solid Waste Management Centre (SWMC), Tuiriala bawlhhlawh paih tawh hman nawn theih (recycable)-te chu hralh mek a ni a, bawlhhlawh tawih thei atanga lei tha siam chhuah pawh hralh mek a ni bawk.
SWMC hi December 11, 2019 khan hawn a ni a, UD&PA hnuaia State Investment Programme Management & Implementation Unit (SIPMIU)-in an enkawl phawt hnuah January 20, 2022 atang khan Aizawl Municipal Corporation (AMC) kutah a awm tan.
AMC-in bawlhhlawh sawngbawlna hmun an enkawl hnuah bawlhhlawh chi thuma an thliar hman nawn theih (recycable waste), bawlhhlawh tawih thei leh thil dang atana hman nawn theih tawh lo bawlhhlawhte chu suma chantir ngei tuma hma an lak nghal thu AMC Excutive Councillor, incharge Solid Waste Managment Laltlanzova Khiangte chuan The Zozam Times a hrilh.
Recycable waste lei khawm tur dealer 18 an awm thu leh chung mite tan chuan stall an siamsak thu a sawi a, bawlhhlawh hai thin (rag picker) leh bawlhhlawh phur motor driver-te hnen atangin dealer-ten bawlhhlawh chu an lei a, Guwauhati-ah an hralh thin thu a sawi.
Dealer-ten recycable waste an hralh tawh dan sawiin, “Thir lam chi quintal 211, paper lam chi quintal 1,767, plastic quintal 1,739 an hralh tawh a, heta tang hian AMC-in chhiah Rs 1,21,216 kan la tawh,” a ti.
Chhiah an lak dan a sawi danin thir chi lam atangin chi-ah quintal khatah Rs 75, paper lam chi-ah quintal khatah Rs 35 leh plastic-ah quintal khatah Rs 25 zel an la a ni.
Bawlhhlawh tawih thei atanga lei tha an siam chhuah bag 100 an hralh tawh tih Tlanzova chuan sawi bawkin, demand a san nghal thu a sawi rualin AMC tan sum hnar tha tak a nih an beisei tih a sawi.
AMC leh waste tech & bio energy te thawk dunin SWMC-a bawlhhlawh paih tawih thei atangin lei tha an siam chhuak a, lei tha hralhna atanga sum hmuh zaa 25 chu AMC hnena lut tur a ni.
SWMC-a bawlhhlawh an thliar hran zinga thil dang atana hman nawn theih tawh lo bawlhhlawhte pawh awmze neia thehthang a ni a, state thenawma cement factory-a an meipuia hal tel turin truck trip tam tak phurh chhuah a nih tawh thu a sawi.
Aizawl chhunga bawlhhlawhte chu hnawksak satliah ni lo turin suma chantir zel an tum thu a sawi a, tunah pawh bawlhhlawh hai thinte tan awlsam zawka sum hmuhna an siamsak tiin, tun dinhmunah sum lak luh tam nghal vut vut lo mah se chhungkaw eng emaw zat tan eizawnna tur kawng a inhawn belh zel an beisei tih a sawi.
Tlanzova chuan bawlhhlawh paih danah mipuiin AMC-in ruahmanna an siamte an zawm that viau tawh rualin tun aia tan lak leh zuala thliar hran uluk zel a tul tih a sawi a, suma chantir theih bawlhhlawhte sawngbawl a nih zel theih nan tanrual tlan a tul hle tih a sawi bawk.