Rajya Sabha MP K. Vanlalvena’n Mizoram zalenna sualtu Hnam sipaite tanna Tuirial jail hmun hlui chu nimin khan tlawhin, Tuirial Jail hmun hlui chu humhalh a nih tur thu a sawi.
Tuirial Jail-ah hian Mizo hnam sipai zalenna sualtu mi engemawzat an tang thin a. Jail pindan chhung aṭanga lei verhin, October ni 16, 1979 zanlaiah mi 18 an tlan chhuak a. Nimina tlawhtu Rajya Sabha MP K. Vanlalvena chuan “Mizo hnam pasalṭhate tlanchhuahna hmun hi a hlu a, ṭhangthar, zirlaite leh khualzin te tlawh theih turin a hmun hi MP fund aṭanga cheibawl a ni dawn” a ti.
K Vanlalvena chuan “Lei verhna lai chu danglam deuh tawh mahse, lei verh kua an hnawhna te kan hai chhuak leh ang a. Zalenna sualtu ten tha leh zung nasa tak senga an beihna hi a hlu a, thangthar zawk te thinlungah ram leh hnam hmangaihna thinlung kan tuh zelna tur hmun pawimawh tak a nih ka ring a ni, a ti bawk.
Rajya Sabha MP-in Tuirial jail a tlawhnaah hian October ni 16, 1979 zanlaia he jail atanga mi 18 tlanchhuak zinga tel Lalhminga leh Lalrengliana te pawh telin, an lei verh dan chanchin te an sawi a. Thla hnih chhung zet hmanraw mumal hmang lovin feet 50 vela thui ṭawngṭai chunga an verh thu an sawi. He jail-a lei verh aṭanga tlanchhuak mi 18 zingah mi 8 chu an la dam a ni.
Tuirial jail hlui hmun hi 38 Bn.BSF-in an luah mek a. K Vanlalvena chuan a hmunhma lo samfaina man tur Tuirial Airfield VCP Lalthangluaia hnenah a pe nghal bawk a ni.