THIAMNA LEH ŢAWNG –

HC Vanlalruata

Kan ţhianpa pakhat chu, “Ţawng chi 4 a thiam a, mahse, thlawhna ţumhmunah leh rel chawlhhmunah a hman tlâk loh vek,” tiin an fiam ţhin a. A chhan chu a ţawng thiamte kha Mizoram chhunga Zofate ţawng zing ami vek a nih tho vang a ni. Mizote hian tharum leh ralthuam ţha zawk hmanga min hneh a, sakhaw hmanga kan nunphung, hnam ziarâng leh tihdanphung zawng zawng min thlâk saktu mi ngo, a bikin British ho khu kan ngaisâng em em mai a. An ţawng pawh khawvel ţawng zingah kan ngaisâng ber a, ţhenkhat phei chuan kan zah luatah kan hmang ţha ngam mang lo ţhin a nih hi.

Sap ţawng thiam chu lehkhathiam a ngaihna, han ngaihtuah thuak a dik áwm tak, mahse ngaihdan mawl tak ni si hian Mizote hi min tibuai rei tawh khawp mai. He ngaihdan leh pawmdan mâwl tak avang leh thiam lo nih kha zahthlak a ngaihna, sap ţawng thiam lo chu lehkhathiam ni pha ve lova ngai kan tam avangin, naupang lehkha zir ţan tir zawng zawng mai sap ţawng thiam tir tumin kan han bei ta tak tak mai a.

Chu duhdan chu hria-in sap sikul kan tih mai, ‘English medium school’ a lo ding zawih zawih a. Zirlai nu leh pate’n kan bawh ruih ruih a, mimal din leh enkawl a nih hlawm avangin, sorkar sikula a thlâwn a luhtir ang chu sawi loh, thlatinin pawisa tam tak kan chawi ta ţawk ţawk mai a. Mahse, kan tu leh fate, sikula an hotute’n sap ţawng lova ţawng an khap avanga loh theih lohva sap ţawnga an ţawng ri kha mawi kan ti a, rangkachak thlêng a lunghlu tla ri ang maiin ngaihnawm kan ti a ni. Kan sum senso kha nâ kan ti lova, “Kan hloh hlépah kan chhiar” kan ti hmiah hlawm mai a nih hi.

Ni e, khawvel mihring, hnam hrang leh ţawng hrang hrang hmangte hian inbiakpawh kan mamawh a. Ţawng thiam hi a pawimawhna sawi nép rual pawh a ni lo. Khawvel ţawng tam thei ang ber thiamte hlei hlei hi a ţangkai a ni. Mizo bik han thlûr leh ta ila, phailam leh India ram páwn a hnathawkte hian sap ţawng leh vai ţawng kan tih mai, Hindi an thiam hi a ţha lo tih rual a ni lo.

Entirna hnaivai atan – Mizo zinga football khel thiam, academy a lut leh club lian a tel pha te, police leh sipai a tang, Mizoram páwn a awm ngai hrim hrimte tan pawh, sap ţawng leh vai ţawng thiam tluk a awm lova, Mizoram chhungah pawh a pawimawhna a nep chuang vak lo. Sorkar hnathawk tan ngat phei chuan an pi leh pu hnamdang IAS officer-te nena duhdan sawi thei tur chuan, khawvela ţawng tlanglâwn ber pakhat, sap ţawng lo thiam hi a ţha em em a. Midang nuih ruala nuih theih hrim hrim pawh hi pawimawh tak mai a ni.

Sawi tawh angin Bible-a a inziah dan anga Babel in sâng sak hnu a khawvela mihringte’n ţawng hrang hrang kan hman tak hnu hian; Siamtu kutchhuak vek kan nihna leh khawvela remna leh muanna hnuai a, a siam hnam hrang hrangte inngeih tlang dial diala kan awm theihna atan chuan, kan inbiak pawh theih hi a pawimawh hle a. Chumi atan chuan kan hman tlán theih ţawng hi a pawimawh em em tih loh rual a ni lo.

Chutiang a nih lai chuan, sap ţawng thiam apiang lehkhathiam a kan ngai zel mai hi chu, a buk ţhelhin kan ţhelh a ni. Mingo chenna leh an awp ţhin mihang tam zawk na ramah pawh, sap ţawng thiam nal em em, lehkha thiam hauh lo leh thluak nei lo tak tak, changkan chu sawi loh, chênbeh tak tak, chhawrtlâk bawk loh an tam lutuk. Sap ţawng thiam hi lehkha thiam leh mithiam tehna tling a ni lova, tling ni sela chuan tunhma thingtlâng aţanga sikul kal chhuak All India Service tam tak kan neih theih lai ai khan, tunah hian kumtin kan inziak tling zawih zawih zawk tur a ni ang. A nih loh zia chu a hre chiangtu vek kan ni.

Sap ţawngte, vai ţawngte leh India ram bakah khawvela ţawng hrang hrang thiam tam hi a ţha teh meuh mai a, sawisél chi a ni hauh lo. Mahse, eng ţawng emaw thiam nazawng mithiam leh lehkhathiam tehna atana kan hmang hi a dik lo hulhual a ni. Zirna dik leh thiamna dik chu chhawrtlâk leh hnathawk thei tura inzir chhuah hi a ni zawk. National Education Policy duanchhuah thar berah hian mahni pianpui ţawng (mother tongue) a lehkha zir chhoh turin ruahmanna siam a ni a. Hei hi a tak a kan kalpui a, English medium school kalphung kan siam danglam hi a pawimawh hle dawn a ni.

Kan hnam ţawng, kan pianpui ţawng ngei mai a kan zir hi chu kan hre bel nge nge a. Tuna kan kalphung anga sap ţawng zir ngai bawk, sap ţawnga chhiarkawp, science leh subject dangte zir ngai tho bawk si hian, kan zirna kalphung (education system) hi a sawp chhe nasa tawh hle a ni tih chu, a rahah kan hmu rei tawh. Vaki/vaiva ţawng thei anga inzirtir hi an pâwl a sang telh telh a, an bo telh telh a, sap ţawng thiam hle siin lehkha thiam lo kan inchhuah tam hle tawh a ni. An zingah taima leh teirei peih, tih tak taka zir an awm ngei mai a, a nâwlpui chuan an chhiat phah nasa hle a ni.

Sorkar lah chuan sorkar sikul a zirlai tam zawk huiluh theihna beiseiin, SSA hnuai-ah sikul ţhenkhat chu English medium-ah a let chiam chiam a. Hei hian kan zirna kalphung a tichhe lehzual a. A tak a thiamna leh hriatna paw chhuak si lovin, kan zirlai tam tak chu sap ţawnga an ţawng theih phawt chuan kan lungawi em em mai ni ber hian a lang. Sorkar hmasa hunlai daih tawhah khan cheng tam tak séngin, Education Reforms Commission din a ni a, mahse, he commission rawtna a tak a tipuitling turin pawisa kan nei leh si lo a nih kha. A pawi khawp mai.

Awlsam taka zirna kalphung kan siamţhat theih dan tur ni a keini, helam a thiamna sang nei ve hauh lovin rawtna kan siam theih chu, sikul bul an ţan chhoh lai a zirlaite’n an hriatthiam theih ngei tura anmahni pianpui ţawnga lehkha an zir hi a pawimawh hmasa chu a ni. Hre thiam chiang si lova hnamdang ţawng hmanga zirlai naupang te te kan zirtir hi sim daih a hun tawh. Ţawng thiam aiin hriatna (knowledge) leh finna (wisdom) tak tak neih a pawimawh zawk tih hi kan hriatchian hle a ngai a ni.

Vai ţawng kan tih mai, Hindi hi zir thûk lutuk aiin, ţawng thei tura inzirtir a pawimawh a, Hindi a thil sawi thei leh chhiar theih hi sikul pangngai aţanga zirchhuahah chuan a tawk viau. Thiam tak tak tur a luhchilh a zir bing a nih loh chuan. Sap ţawng pawh hi Higher Secondary School velah ţawng zir a ţha a, pâwl sang zelah chuan ziah thiam pawh zir ngei ngei chu a ngai. India rama sorkar hnathawk dinhmun sang ber, All India Service inziak tling thei tur chuan thiam viau chu a ngai.

Chu’ng zawng zawngah chu a bul thûmah kan pianpui ţawng ngei a thil kan zir ţan chhoh hi a pawimawh ber a. Kan ţawng, kan hriatthiam theih ngei a hriatna leh finna chhar khawpa kan inzir chhoh phawt chuan, hnamdang ţawng pawh kan harsat zui lovang. Ţawng thiam hi a ţha e, mahse, ţawng thiam aia pawimawh zawk chu hriatna, thiamna leh finna nei thei khawpa lehkha zir hi a ni. Chutianga kan kal hunah chuan kan hnam hi lehkhathiam diktak kan ni tawh ang a, ziak leh chhiar thiam tamna state nih ai chuan a ropuiin ngaihsan kan hlawh zawk ngei bawk ang.

One thought on “THIAMNA LEH ŢAWNG –

  1. Pu Ruata ngaihdan hi 100% in kan zawm thin a, mahse heta a ngaihdan hi chu ka zawm pui thei tlat lo. Kan tu leh fate hian Mizotawng hi a hranpaa zir an ngai lo, in lamah tawng dang kan hman pui loh avangin. School an kal theih atanga Saptawng emaw, Vaitawng emaw an zir hian heng tawng dang hi an thiam bel phah a, zirna sang zawka an kalna zelah nasa takin a pui a ni. High school or Higher lama Saptawng an zir tan chauh chuan All India Service a Mizo kan mamawh hi engtikah mah kan inphuhruk lo ang.

Leave a Reply

Your email address will not be published. Required fields are marked *

error: Content is protected !!