Assam-a tui lian nasa avangin Mizoramah nitin mamawh lakluh a khaihlak tan a, chawhmeh man a nghawng tan mek.
Tuilianin Silchar khawpui a chim buai nasat tawh avangin lirthei hmanga inkalpawh theih a ni tawh lova, hei hian lirthei hmanga Mizorama mamawh phurhluh pawh a tikhaihlak a, Thawhtanni zing dar 8 atanga Thawhlehni zing dar 8 inkarah Assam atangin Vairengte Police check gate paltlang lirthei 84 chauh a awm.
Vairengte Police check gate-in an chhinchhiah danin nimin zing dar 8 atanga tlai dar 6 thlengin Assam atangin lirthei 49 chauh a lut bawk a. Lirthei 27 chu mipui nitin mamawh phur an ni a, 16 chu mihring phur lirthei an ni.
The Zozam Times zawhna chhangin Vairengtea Commerce & Industry check gate Inspector Rohlua chuan Inrinni atang khan Assam atangin chawhmeh phur lirthei a luh mumal tawh loh thu a sawi a, chawhmeh phurh luh mumal loh hian nghawng a nei len vat a hlauhthawnawm tih a sawi.
Mizorama lirthei lut mumallo hian Aizawl bazarpui pawh a nghawng tan a. Bazar tlawhtu The Zozam Times zawhna chhangin chawhmeh zuarte chuan phai chawhmeh a thlen mumal tawh lo thu an sawi a, “A thleng chhunte pawh a chhe angreng a, a man pawh a to a, phai chawhmeh man a to phah tan,” an ti.
Aizawl chhung Zarkawt leh Dawrpui Venga whole sale dawr lian neitu (eichawp zuar) hnamdangte chuan alu, tel, purunsen leh artui an neih mang tawh loh thu The Zozam Times an hrilh a, dawr thenkhat chuan Inrinni zanah bungrua a thleng a, a bak chu a thleng leh tawh lo tih an sawi.
Hnamdang sumdawng thenkhat chuan chawhmeh thenkhat an la neih chhunte chu man tovin an hralh lo tih an sawi a. Hetihlai hian veng thenkhatah erawh alu man erawh a to phah tawh.
Assam-in harsatna lian zawk an tawh hma hian Meghalaya-a ruah sur nasain National Highway a tihchhiat avangin kar kalta khan Mizoramah tuialhthei lakluh a khaihlak tawh a, Aizawl khawpui chhunga filling station-te pawhin khawl sa an nei tam tawh lo.
All Mizoram Petroleum Dealers Association (AMPEDA) hruaitute chuan tuialhthei lakluh a khaihlakna a rei tawh avang hian Aizawl khawpui chhunga filling station ten petrol leh diesel an nei tam tawh lo hle tih an sawi a, petrol pump zawng zawng deuhthawin coupon tel lova an pek chhuah tawh loh thu The Zozam Times an hrilh.
Hetihlai hian supply department hotute chuan Mizorama tuialhthei chawkluhna kawng chhia chu siamthat a ni tan a, tuialhthei phurte pawhin Mizoram an rawn pan tan tawh tih an sawi thung a, tun dinhmunah chuan la harsa deuh rih mahse ni reilote hnuah erawh a ziaawm an beisei tih an sawi.
Chawhmeh leh zela a kan la intodelh lo a nih chuan Mizo mipuite hi kan va han khawngaihthlak dawn tak em! Thalai ah na na na hi chuan kan intodelh viau tawhin ka lo hria a. Alu, dal tih vel leh chini, tel tih vel hi thudang ni ta se, thla I tal hi chu phsi lam ring lo thei tawh i la a duhawm khawp mai