Aizawl: Mizo Hmeichhe Insuihkhawm Pawl (MHIP) Day vawi 48-na chu nimin khan Mizoram pumah kawng hrang hranga lawm a ni.
He ni hi branch hrang hrangte chuan anmahni branch huam chhung theuhah an remchan dan angin an hmang a, branch tam zawk chuan nimin chhun lamah he ni pual inkhawm an buatsaih a, thupui thlan bik zirhona hun te an nei a, MHIP member kum upate chawimawina hun leh intihhlimna hrang hrangte an buatsaih.
MHIP Day puala vantlang hmun then fai hnatlang nei te, damdawi in hrang hranga damlote tana ei tur sem te, an branch member, damlote hnena tanpuina pe te pawh an awm bawk.
He ni pual hian MHIP General Headquarters chuan thuchah tichhuakin MHIP member-te an thuvawn ‘Mite tanpui’ a nih ang ngeia an awmna hmun apianga mi dangte tanpuitu ni zel turin an fuih thar a, MHIP thuthlung chu nunpui turin leh vawng reng turin member te an fuih bawk.
MHIP hi July 6, 1974 khan Society Act, 1860 hnuaiah inziak luta din a ni a, Treasury Square, Aizawlah Hqrs. neiin hmeichhiate hamthatna tur leh khawtlang tana thil tha tur tiin chak takin an ding chho zel a ni.
Tunah hian sub headquarters 10, block 26, joint MHIP 19 leh branch 753 a awm mek a, member zawng zawng hi mi 2,80,000 bawr vel an ni.