Serie A champion AC Milan in striker thar an lalut a, Liverpool atangin free transfer in Divock Origi chu an lalut fel.
Tun season a Liverpool a contract a neih hmang zo Origi hian sawmtu dang a neih nual karah San Siro pan a thlang a. Kum 27 mi hian tun season liamta khan Reds tan inelna hrang hrangah vawi 18 chauh a khel a, heng zingah hian Premier League bikah vawi sarih chauh a inlan.
Kum 2014 a Lille atanga Liverpool a contract ziak Origi hian kum 2015 khan first team a zawm a. An tan inelna hrang hrangah vawi 175 inkhel hmanin goal 41 a khung a, midang khung tur vawi 18 a siamsak.
Striker a ni chungin tlarhmaah team tana chhawr kual a ni fova, ding leh vei lam sirah khelhtir fo niin Anfield club tan hian goal pawimawh a khung thei hle a. Kum 2019 UEFA Champions League final-ah Tottenham laka an chakna nemnghehna goal a khung.
Rossoneri hnenah hian Origi hian kum li contract a ziak a, kum khatah Euro maktaduai 4 vel a hlawh dawn niin an sawi. Liverpool hian June 9 khan Belgium international hi a chhuah tur thu an lo sawi chiang tawh.
Milan hian an squad-ah striker rinrawl tur an nei upa tawh a, kum 40 mi ni tawh Zlatan Ibrahimovic chu kum khat contract ziahpui leh tum mahse a khup zai a nih avangin kuminah a inkhel thei dawn lo chiang a. Hei vang hian senior striker rin tur kum 35 mi Olivier Giroud chiah an nei a, Origi hian duhthlan tur a siam belh ang.
Liverpool hian an tlarhma a khel mi pathum an chhuahtirna a ni a, Benfica star Darwin Nunez an lakluh bakah Portuguese rawlthar Fabio Carvalho an lalut leh bawk.