Mizoram Super League champion lai Zarkawt BCA in an lallukhum humhim nawn leh turin huntha an nei dawn a. Thawhlehni zana final lut tur zawnna inkhelah 86-77 in Khatla TBL an hneh.
MSL7 Play In-ah hian league a san a pawimawh a. Thawhlehni zana inkhelte hi league hmahruaitu leh pahnihna te an ni a. League a pakhatna in hnehna an chan avangin final an lut tlang.
Final lut turin Khatla TBL hian Zarkawt BCA hi vawi hnih hneh an mamawh a, a tlawm zawka an tan avangin final luh inbeiseina nei turin Mission Veng Hotshots leh Tuikual South inkhel atanga tling zawk an hmuak mek a, an chak chuan final an lut ang.
R.Dengthuama Indoor Stadium a Play In inkhelah point in score chhawkin team pahnih an intlansiak a. Foreign player pahnihte chauh an langsar lova, Mizo player tha ten inkhel an nghawng thui a. An basketball khelh a hmuhnawm.
Zarkawt BCA tan Joseph Allen chuan point 32 leh rebound 10 a la a, Lalrina Renthlei chuan point 22 score in Matthew Remtluanga Sailo leh Zonunsanga ten point 12 leh 11 an score a, Zonunsanga 3 point vawi thum luh a pawimawh.
Khatla TBL tan Levi Bradley Jr. chu point 22 score a team tana point la hnem ber a ni a. K. Lalthianghlima chuan dawtin point 20 a score a, Vanlalrinchhana’n point 14 score in anni pahnih hian 3 points pawimawh vawi hnih ve ve an lut bawk.
Vanlalthazuala chuan point 10 a score bakah assist vawi 8 neiin an offense-ah a tangkai.